ಮೈಸೂರು ದಸರಾ 2025: ನಾಡಹಬ್ಬದ ವೈಭವಕ್ಕೆ ಮೈಸೂರು ಸಜ್ಜು – ಮುಖ್ಯ ಕಾರ್ಯಕ್ರಮಗಳ ವೇಳಾಪಟ್ಟಿ ಪ್ರಕಟ

ಮೈಸೂರು, ಜೂನ್ 28:
ರಾಜ್ಯ ಸಂಸ್ಕೃತಿಯ ಪ್ರತಿರೂಪವಾಗಿರುವ ನಾಡಹಬ್ಬ ಮೈಸೂರು ದಸರಾ 2025ರ ಆಚರಣೆಗೆ ಮೈಸೂರು ನಗರದ ಸುಂದರ ಸಜ್ಜು ಆರಂಭವಾಗಿದೆ. ಇತ್ತೀಚೆಗಷ್ಟೇ ಸರ್ಕಾರದ ವತಿಯಿಂದ ಈ ಬಾರಿಯ 11 ದಿನಗಳ ದಸರಾ ಹಬ್ಬಕ್ಕೆ ಸಂಬಂಧಿಸಿದಂತೆ ಪ್ರಮುಖ ದಿನಾಂಕ ಹಾಗೂ ಧಾರ್ಮಿಕ ಕಾರ್ಯಕ್ರಮಗಳ ವೇಳಾಪಟ್ಟಿಯನ್ನು ಪ್ರಕಟಿಸಲಾಗಿದೆ.

ಈ ಬಾರಿಯ ದಸರಾ ಕಾರ್ಯಕ್ರಮಗಳು ಈ ಕೆಳಕಂಡ ರೀತಿಯಲ್ಲಿವೆ:

📅 ಆಗಸ್ಟ್ 4, 2025 – ಗಜಪೂಜೆ
ಹುಣಸೂರು ತಾಲೂಕಿನ ವೀರನಹೊಸಹಳ್ಳಿ ಗ್ರಾಮದಲ್ಲಿ ಮಧ್ಯಾಹ್ನ 12:34 ರಿಂದ 12:59ರೊಳಗೆ ತುಲಾ ಲಗ್ನದ (ಅಭಿಜಿತ್ ಮುಹೂರ್ತ) ಸಂದರ್ಭ ಗಜಪೂಜೆ ನೆರವೇರಲಿದೆ. ಈ ಮೂಲಕ ದಸರಾ ಹಬ್ಬದ ಅಧಿಕೃತ ಆವೃತ್ತಿಗೆ ಚಾಲನೆ ಸಿಗಲಿದೆ.

📅 ಸೆಪ್ಟೆಂಬರ್ 22, 2025 – ದಸರಾ ಉದ್ಘಾಟನೆ
ಮೈಸೂರು ಚಾಮುಂಡಿ ಬೆಟ್ಟದ ಚಾಮುಂಡೇಶ್ವರಿ ದೇವಾಲಯದ ಆವರಣದಲ್ಲಿ ಬೆಳಗ್ಗೆ 10:10 ರಿಂದ 10:40ರ ವರೆಗೆ ಶುಭ ವೃಶ್ಚಿಕ ಲಗ್ನದಲ್ಲಿ ದಸರಾ ಮಹೋತ್ಸವದ ಅಧಿಕೃತ ಉದ್ಘಾಟನೆ ಜರುಗಲಿದೆ.

📅 ಅಕ್ಟೋಬರ್ 2, 2025 – ನಂದೀಧ್ವಜ ಪೂಜೆ ಮತ್ತು ಜಂಬೂಸವಾರಿ
ಮೈಸೂರು ಅರಮನೆ ಕೋಟೆ ಆಂಜನೇಯಸ್ವಾಮಿ ದೇವಾಲಯದ ಆವರಣದಲ್ಲಿ ಮಧ್ಯಾಹ್ನ 1:00ರಿಂದ 1:18ರೊಳಗೆ ಧನುರ್ ಲಗ್ನದಲ್ಲಿ ನಂದೀಧ್ವಜ ಪೂಜೆ ನೆರವೇರಲಿದೆ. ನಂತರ ಮೈಸೂರು ಅರಮನೆ ಆವರಣದಲ್ಲಿ ಮಧ್ಯಾಹ್ನ 4:42 ರಿಂದ 5:06ರ ವರೆಗೆ ಶುಭ ಕುಂಭ ಲಗ್ನದಲ್ಲಿ ಜಂಬೂಸವಾರಿ ಹಾಗೂ ಪುಷ್ಪಾರ್ಚನೆ ಕಾರ್ಯಕ್ರಮ ಜರುಗಲಿದೆ.

ವೈಭವದ ನಿರೀಕ್ಷೆ:
ರಾಜ್ಯ ಸರ್ಕಾರ, ಮೈಸೂರು ಜಿಲ್ಲಾ ಆಡಳಿತ ಹಾಗೂ ಸಂಸ್ಕೃತಿ ಇಲಾಖೆ ಈ ಬಾರಿಯ ದಸರಾ ಹಬ್ಬವನ್ನು ಇನ್ನಷ್ಟು ಆಕರ್ಷಕ ಹಾಗೂ ಜನಪರವಾಗಿ ಆಚರಿಸಲು ಸಜ್ಜಾಗಿದೆ. ಮೆರವಣಿಗೆಗಳು, ಕಲಾ ಕಾರ್ಯಕ್ರಮಗಳು, ಸ್ಪರ್ಧೆಗಳು ಮತ್ತು ಪಟಾಕಿ ಶೋ ಸೇರಿದಂತೆ ಹಲವು ಕಾರ್ಯಕ್ರಮಗಳನ್ನೊಳಗೊಂಡ ದಿನಚರಿಯನ್ನು ಹತ್ತಿರದಲ್ಲೇ ಬಿಡುಗಡೆ ಮಾಡಲಿದ್ದು, ಪ್ರವಾಸಿಗರು ಹಾಗೂ ಭಕ್ತರಿಗೆ ಅವಕಾಶ ಕಲ್ಪಿಸಲಿದೆ.

ದಸರಾ ಉತ್ಸವದ ಹಿನ್ನೆಲೆ:
ಮೈಸೂರು ದಸರಾ ಹಬ್ಬವು ವಿಜಯದಶಮಿಯೊಂದಿಗೆ ಅಂತ್ಯವಾಗುವ ಧಾರ್ಮಿಕ ಹಾಗೂ ಸಾಂಸ್ಕೃತಿಕ ಹಬ್ಬವಾಗಿದ್ದು, ಚಾಮುಂಡೇಶ್ವರಿ ದೇವಿಯ ವಿಜಯದ ಪ್ರತೀಕವಾಗಿ ಆಚರಿಸಲಾಗುತ್ತದೆ. ಜಂಬೂಸವಾರಿ, ಅಂಬಾರಿಯಲ್ಲಿ ದೇವಿಯ ಮೂರ್ತಿಯು ಮೆರವಣಿಗೆಯ ಮೂಲಕ ನಗರದ ಪ್ರಮುಖ ರಸ್ತೆಗಳಲ್ಲಿ ಸಾಗುವುದು ವಿಶೇಷ ಆಕರ್ಷಣೆಯಾಗಿರುತ್ತದೆ.

ಇದನ್ನು ಓದಿ: ಶ್ರವಣಬೆಳಗೊಳ: ಆಚಾರ್ಯ ವಿದ್ಯಾನಂದ ಮಹಾರಾಜರ ಶತಮಾನೋತ್ಸವ: ಜೈನ ಪರಂಪರೆಯ ಗೌರವ ಆಚರಣೆ- ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಭಾಗಿ