ಹಾಸನಾಂಬ ದೇವಾಲಯ ದರ್ಶನ ಮತ್ತು ಶ್ರೀ ಸಿದ್ದೇಶ್ವರಸ್ವಾಮಿ ಜಾತ್ರಾ ಮಹೋತ್ಸವಕ್ಕೆ ಸಕಲ ಸಿದ್ಧತೆ — ಜಿಲ್ಲಾಡಳಿತದಿಂದ ಸಮಯನಿಗದಿಯ ಪ್ರಕಟಣೆ

ಹಾಸನ, ಅಕ್ಟೋಬರ್ 8: ನಾಡಿನ ಪ್ರಸಿದ್ಧ ಹಾಸನಾಂಬ ದೇವಾಲಯ ಹಾಗೂ ಶ್ರೀ ಸಿದ್ದೇಶ್ವರಸ್ವಾಮಿ ಜಾತ್ರಾ ಮಹೋತ್ಸವ ಕಾರ್ಯಕ್ರಮಗಳ ಸಿದ್ಧತೆಗಳು ಅಂತಿಮ ಹಂತಕ್ಕೆ ತಲುಪಿದ್ದು, ಜಿಲ್ಲಾಡಳಿತವು ಭಕ್ತರಿಗೆ ಹಾಗೂ ಗಣ್ಯರಿಗೆ ಸಂಬಂಧಿಸಿದ ಪೂಜೆ ಮತ್ತು ದರ್ಶನ ಸಮಯವನ್ನು ಪ್ರಕಟಿಸಿದೆ.

ಸಂಪ್ರದಾಯದಂತೆ, ದೇವಾಲಯವು ಅಕ್ಟೋಬರ್ 9ರಂದು ಮಧ್ಯಾಹ್ನ 12.00 ಗಂಟೆಗೆ ಶಾಸ್ತ್ರೋಕ್ತ ಪೂಜೆಯೊಂದಿಗೆ ತೆರೆದುಕೊಳ್ಳಲಿದೆ. ಮೊದಲ ದಿನ ಪೂಜಾ ಕೈಂಕಾರ್ಯಗಳಿಗೆ ಮಾತ್ರ ಅವಕಾಶವಿದ್ದು, ಸಾರ್ವಜನಿಕರಿಗೆ ದರ್ಶನಾವಕಾಶವಿರುವುದಿಲ್ಲ.

ಸಾಮಾನ್ಯ ಭಕ್ತರಿಗೆ ಅಕ್ಟೋಬರ್ 10ರಂದು ಬೆಳಿಗ್ಗೆ 6.00 ಗಂಟೆಯಿಂದ ದರ್ಶನ ಆರಂಭವಾಗಿ, ಅಕ್ಟೋಬರ್ 22ರಂದು ಸಂಜೆ 7.00 ಗಂಟೆಯವರೆಗೆ ಮುಂದುವರಿಯಲಿದೆ. ಪ್ರತಿ ದಿನ ಮಧ್ಯಾಹ್ನ 2.00ರಿಂದ 3.30ರವರೆಗೆ ಹಾಗೂ ಬೆಳಗಿನ ಜಾವ 2.00ರಿಂದ 5.00ರವರೆಗೆ ದೇವಾಲಯದಲ್ಲಿ ನೈವ್ಯಧ್ಯ ಮತ್ತು ಅಲಂಕಾರ ಕಾರ್ಯ ನಡೆಯುವ ಕಾರಣ, ಈ ಅವಧಿಯಲ್ಲಿ ದರ್ಶನಕ್ಕೆ ವಿರಾಮ ಇರುತ್ತದೆ.

ಜಾತ್ರೆಯ ಕೊನೆ ದಿನವಾದ ಅಕ್ಟೋಬರ್ 23ರಂದು ಪೂಜಾ ಕೈಂಕಾರ್ಯಗಳೊಂದಿಗೆ ಮಹೋತ್ಸವ ಸಮಾರೋಪವಾಗಲಿದೆ.

ಜಿಲ್ಲಾಡಳಿತವು ಅಕ್ಟೋಬರ್ 10, 11, 17, 18, 19, 20ರಂದು ಭಕ್ತರ ಭಾರೀ ಸಂಚಾರದ ನಿರೀಕ್ಷೆ ವ್ಯಕ್ತಪಡಿಸಿದ್ದು, ಭಕ್ತರು ಬೇರೆ ಸೂಕ್ತ ದಿನಗಳಲ್ಲಿ ದರ್ಶನಕ್ಕೆ ಆಗಮಿಸುವಂತೆ ವಿನಂತಿಸಿದೆ. ದರ್ಶನಕ್ಕೆ ಧರ್ಮದರ್ಶನ, ₹300 ಮತ್ತು ₹1000 ಹೀಗೆ ಮೂರು ಪ್ರತ್ಯೇಕ ಸಾಲುಗಳ ವ್ಯವಸ್ಥೆ ಮಾಡಲಾಗಿದೆ.

ಗಣ್ಯರಿಗೆ ಕಟ್ಟುನಿಟ್ಟಿನ ಸಮಯ ನಿಯಮಗಳು:-
ಸಚಿವರು, ಶಾಸಕರು, ನ್ಯಾಯಮೂರ್ತಿಗಳು, ಉನ್ನತ ಅಧಿಕಾರಿಗಳು ಹಾಗೂ ಇತರೆ ಗಣ್ಯರು ತಮ್ಮ ಆಗಮನದ ದಿನಾಂಕವನ್ನು ಜಿಲ್ಲಾಧಿಕಾರಿಗಳ ಕಚೇರಿಗೆ ಪೂರ್ವದಲ್ಲಿ ತಿಳಿಸಬೇಕಿದ್ದು, ನಿಗದಿತ ದಿನದಲ್ಲಿ ಬೆಳಿಗ್ಗೆ 10.30ರಿಂದ ಮಧ್ಯಾಹ್ನ 12.30ರ ಒಳಗೆ ಮಾತ್ರ ದರ್ಶನ ಪಡೆಯಲು ಅವಕಾಶವಿರುತ್ತದೆ.

ಗಣ್ಯರು ಮೊದಲು **ಹಾಸನ ಸರ್ಕಾರಿ ಅತಿಥಿ ಗೃಹ (ಪರಿವೀಕ್ಷಣ ಮಂದಿರ)**ಗೆ ಆಗಮಿಸಬೇಕಾಗಿದ್ದು, ಅಲ್ಲಿ ಜಿಲ್ಲಾಡಳಿತ ಒದಗಿಸುವ ವಾಹನದ ಮೂಲಕ ದೇವಾಲಯಕ್ಕೆ ತೆರಳಲು ಸೂಚಿಸಲಾಗಿದೆ.

ದರ್ಶನದ ದಿನಾಂಕ ನಿಗದಿ ಪಡಿಸಲು, ಭಕ್ತರು ಮತ್ತು ಗಣ್ಯರು deo.hassan@gmail.com ಈ ಇಮೇಲ್ ಮೂಲಕ ಅಥವಾ ಅಪರ ಜಿಲ್ಲಾಧಿಕಾರಿ ಶ್ರೀ ಮಂಜುನಾಥ ವಿ. (ಮೊಬೈಲ್: 9449343588) ಹಾಗೂ **ಸಹಾಯಕ ಆಯುಕ್ತ ಶ್ರೀ ರಾಜೇಶ್ (ಮೊಬೈಲ್: 8971221368)**ರನ್ನು ಸಂಪರ್ಕಿಸಲು ಕೋರಲಾಗಿದೆ. ತುರ್ತು ಸಹಾಯಕ್ಕಾಗಿ ಹಾಸನ ಉಪವಿಭಾಗ ನಿಯಂತ್ರಣ ಕೊಠಡಿ (08172-257119) ಸಂಖ್ಯೆ ಲಭ್ಯವಿದೆ.

ಭದ್ರತೆ ಮತ್ತು ಸೌಲಭ್ಯಕ್ಕೆ ಆದ್ಯತೆ:-
ಹಿಂದಿನ ವರ್ಷಗಳ ಅನುಭವದ ಆಧಾರದಲ್ಲಿ, ದೇವಾಲಯದ ಪ್ರವೇಶ ಮಾರ್ಗ ಸೀಮಿತವಾಗಿರುವುದರಿಂದ ಹಾಗೂ ದಿನಕ್ಕೆ ಸರಾಸರಿ 2 ಲಕ್ಷ ಭಕ್ತರ ಆಗಮನದ ನಿರೀಕ್ಷೆಯ ಹಿನ್ನೆಲೆಯಲ್ಲಿ ಈ ಬಾರಿ ಹೊಸ ನಿಯಮಗಳು ಜಾರಿಗೆ ತರಲಾಗಿದೆ. ಭಕ್ತರ ಸುಗಮ ದರ್ಶನ, ಸುರಕ್ಷತೆ ಮತ್ತು ಸಂಚಾರ ವ್ಯವಸ್ಥೆಗೆ ಜಿಲ್ಲಾಡಳಿತ, ಪೊಲೀಸ್ ಇಲಾಖೆ ಹಾಗೂ ವಿವಿಧ ಸರ್ಕಾರಿ ಘಟಕಗಳು ಸಹಕಾರ ನೀಡುತ್ತಿವೆ.

ಸಾಂಸ್ಕೃತಿಕ ಸೊಬಗು ಮತ್ತು ಆಕರ್ಷಣೆಗಳು:-
ಜಾತ್ರಾ ಮಹೋತ್ಸವದ ಅಂಗವಾಗಿ ಈ ಬಾರಿ ಮೂರು ವೇದಿಕೆಗಳಲ್ಲಿ ನೃತ್ಯ, ಜಾನಪದ ಕಲೆ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳು ಹಮ್ಮಿಕೊಳ್ಳಲಾಗಿದೆ. ಜೊತೆಗೆ ಹೆಲಿಕ್ಯಾಪ್ಟರ್ ಪ್ರವಾಸ, ಫಲಪುಷ್ಪ ಪ್ರದರ್ಶನ, ವಸ್ತು ಪ್ರದರ್ಶನ ಸೇರಿದಂತೆ ಹಲವು ಆಕರ್ಷಣೆಗಳೂ ಇರಲಿವೆ.

ಜಿಲ್ಲಾಡಳಿತ ಹಾಗೂ ಜನಪ್ರತಿನಿಧಿಗಳು ಸೇರಿ ಈ ಮಹೋತ್ಸವವನ್ನು ಯಶಸ್ವಿಯಾಗಿ ನಿರ್ವಹಿಸಲು ಬದ್ಧವಾಗಿರುವುದಾಗಿ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.