ಮೆಟಾ AI ಗೆ ಧ್ವನಿ ನೀಡಿದ ಮೊದಲ ಭಾರತೀಯ ಸೆಲೆಬ್ರಿಟಿ — ದೀಪಿಕಾ ಪಡುಕೋಣೆ

ನವದೆಹಲಿ, ಅ.17: ಬಾಲಿವುಡ್ ನಟಿ ದೀಪಿಕಾ ಪಡುಕೋಣೆ ಹೊಸ ಗೌರವಕ್ಕೆ ಪಾತ್ರರಾಗಿದ್ದಾರೆ. ಮೆಟಾ ಸಂಸ್ಥೆಯು ತನ್ನ AI ಪ್ಲಾಟ್‌ಫಾರ್ಮ್‌ಗೆ ಧ್ವನಿ ನೀಡಿದ ಮೊದಲ ಭಾರತೀಯ ಸೆಲೆಬ್ರಿಟಿಯಾಗಿ ದೀಪಿಕಾ ಪಡುಕೋಣೆಯವರನ್ನು ಆಯ್ಕೆ ಮಾಡಿದೆ.

ಮೆಟಾ AI ಈಗ ವಿವಿಧ ಭಾಷೆಗಳಲ್ಲಿ ಪ್ರಸಿದ್ಧ ವ್ಯಕ್ತಿಗಳ ಧ್ವನಿಯನ್ನು ಒಳಗೊಂಡುಕೊಳ್ಳುವ ಪ್ರಯೋಗವನ್ನು ಆರಂಭಿಸಿದ್ದು, ಭಾರತದಿಂದ ದೀಪಿಕಾ ಪಡುಕೋಣೆಯವರ ಧ್ವನಿ ಮೊದಲ ಆಯ್ಕೆಯಾಗಿದೆ. ಅವರ ಧ್ವನಿಯ ಆಧಾರದ ಮೇಲೆ ನಿರ್ಮಿತ AI ಸಹಾಯಕ ಬಳಕೆದಾರರೊಂದಿಗೆ ಸಂಭಾಷಣೆ ನಡೆಸುವ ವೈಶಿಷ್ಟ್ಯವನ್ನು ಒಳಗೊಂಡಿದೆ.

ಇತ್ತೀಚೆಗೆ ವಿಶ್ವ ಮಾನಸಿಕ ಆರೋಗ್ಯ ದಿನದ ಸಂದರ್ಭದಲ್ಲಿ ಕೇಂದ್ರ ಆರೋಗ್ಯ ಸಚಿವಾಲಯವು ದೀಪಿಕಾ ಪಡುಕೋಣೆಯವರನ್ನು ಭಾರತದ ಮೊದಲ ಮಾನಸಿಕ ಆರೋಗ್ಯ ರಾಯಭಾರಿಯಾಗಿ ನೇಮಕ ಮಾಡಿತ್ತು.
ಮಾನಸಿಕ ಆರೋಗ್ಯ ಜಾಗೃತಿ ಹಾಗೂ ಯುವಜನರ ಮನೋಸ್ಥಿತಿಯ ಅರಿವಿಗೆ ಅವರು ನೀಡುತ್ತಿರುವ ಕೊಡುಗೆಯನ್ನು ಗಮನಿಸಿ ಈ ಗೌರವವನ್ನು ನೀಡಲಾಗಿದೆ.

ದೀಪಿಕಾ ತಮ್ಮ “ಲೈವ್ ಲವ್ ಲಾಫ್” ಫೌಂಡೇಷನ್‌ ಮೂಲಕ ದೀರ್ಘಕಾಲದಿಂದ ಮಾನಸಿಕ ಆರೋಗ್ಯ ಕ್ಷೇತ್ರದಲ್ಲಿ ಕಾರ್ಯನಿರ್ವಹಿಸುತ್ತಿದ್ದು, ಈಗ ಅವರು ತಂತ್ರಜ್ಞಾನ ಮತ್ತು ಮಾನವೀಯತೆ ಎರಡರ ಮಧ್ಯೆ ಸೇತುವೆಯಂತೆ ಗುರುತಿಸಿಕೊಂಡಿದ್ದಾರೆ.

ಇದನ್ನು ಓದಿ: ಬೆಂಗಳೂರು: ಅಳಿವಿನ ಅಂಚಿನಲ್ಲಿರುವ ಕರ್ನಾಟಕದ ರಾಜ್ಯಪಕ್ಷಿ ನೀಲಕಂಠ