ಬೆಂಗಳೂರು, ಡಿಸೆಂಬರ್ 1: ಕರ್ನಾಟಕದ ಶಾಲಾ-ಕಾಲೇಜುಗಳಲ್ಲಿ ಕನ್ನಡ ಮತ್ತು ಇಂಗ್ಲಿಷ್ — ಈ ಎರಡೇ ಭಾಷೆಗಳು ಕಡ್ಡಾಯವಾಗಬೇಕು ಎಂದು ಕವಿ, ಸಂಸ್ಕೃತಿ ಚಿಂತಕ ಹಾಗೂ ಪ್ರಾಧ್ಯಾಪಕ ಡಾ. ಎಸ್. ರಾಮಲಿಂಗೇಶ್ವರ (ಸಿಸಿರಾ) ಅಭಿಪ್ರಾಯಪಟ್ಟರು. ನಗರದ ಶೇಷಾದ್ರಿಪುರಂ ಕಾಲೇಜಿನಲ್ಲಿ ಗಂಧದಗುಡಿ ಕನ್ನಡ ಸಂಘ ಮತ್ತು ಚೇತನ ಪ್ರತಿಷ್ಠಾನಗಳ ಸಹಯೋಗದಲ್ಲಿ ನಡೆದ ಅಖಿಲ ಭಾರತ ಕನ್ನಡ ನುಡಿ ಸಮ್ಮೇಳನದಲ್ಲಿ ಅವರು ಸರ್ವಾಧ್ಯಕ್ಷರಾಗಿ ಮಾತನಾಡಿದರು.
“ಕನ್ನಡ ತಾಯಂದಿರ ಪಾತ್ರ ಅಪಾರ, ಶಾಲೆಯಲ್ಲಿ ಕನ್ನಡವೇ ಮೊದಲ ಭಾಷೆಯಾಗಬೇಕು”
ಕನ್ನಡದ ಬೆಳವಣಿಗೆಯಲ್ಲಿ ಕನ್ನಡ ತಾಯಂದಿರ ಪಾತ್ರ ಅತ್ಯಂತ ಮಹತ್ವದ್ದು ಎಂದು ಅವರು ಅಭಿಪ್ರಾಯಪಟ್ಟರು.
“ಶಾಲಾ-ಕಾಲೇಜುಗಳಲ್ಲಿ ಕನ್ನಡವೇ ಮೊದಲ ಭಾಷೆಯಾಗಬೇಕು. ಕನ್ನಡ ಓದಲು, ಬರೆಯಲು, ಮಾತನಾಡಲು ಬಲ್ಲವರಿಗೆ ಮಾತ್ರ ಕರ್ನಾಟಕದಲ್ಲಿ ಸರ್ಕಾರಿ ಉದ್ಯೋಗ ಸಿಗುವಂತೆ ಕಾನೂನು ಬಿಗಿಯಾಗಬೇಕು,” ಎಂದು ಡಾ. ಸಿಸಿರಾ ಹೇಳಿದರು.
ಕರ್ನಾಟಕದಲ್ಲಿ ಶಿಕ್ಷಣ ವ್ಯವಸ್ಥೆಯಲ್ಲಿ ಕನ್ನಡ ಮತ್ತು ಇಂಗ್ಲಿಷ್ ಎರಡೇ ಭಾಷೆಗಳು ಕಡ್ಡಾಯವಾಗಬೇಕು; ತೆಲುಗು, ತಮಿಳು, ಹಿಂದಿ, ಮರಾಠಿ ಮುಂತಾದ ಇತರ ಭಾಷೆಗಳು ಐಚ್ಛಿಕವಾಗಿರಬಹುದು ಎಂದು ಅವರು ತಿಳಿಸಿದರು.
“ಕುಟುಂಬದ ಒಗ್ಗಟ್ಟು ಕುಂದಿದೆ; ಕನ್ನಡ ಸಂಸ್ಕೃತಿ ಉಳಿಸುವ ಜವಾಬ್ದಾರಿ ನಮ್ಮೆಲ್ಲರ ಮೇಲಿದೆ”
ಸಮಾಜದಲ್ಲಿ ಕೌಟುಂಬಿಕ ಮೌಲ್ಯಗಳು ಕುಂದುತ್ತಿರುವುದು, ಮಹಿಳಾ-ಪುರುಷರ ಪಾತ್ರಗಳಲ್ಲಿ ಬದಲಾವಣೆಗಳು, ಕುಟುಂಬದೊಳಗಿನ ಹೊಂದಾಣಿಕೆಯ ಕೊರತೆ ಹೆಚ್ಚುತ್ತಿರುವುದರ ಬಗ್ಗೆ ಅವರು ಚಿಂತಿಸಿದರು.
“ತಂದೆ-ತಾಯಿ ಮತ್ತು ಮಕ್ಕಳು ಕೂತು ಮಾತನಾಡುವ ಸಂಸ್ಕೃತಿ ಕಣ್ಮರೆಯಾಗುತ್ತಿದೆ. ಕನ್ನಡ ನಾಡು, ನುಡಿ, ನೆಲ-ಜಲ, ಸಾಹಿತ್ಯ, ಸಂಸ್ಕೃತಿ ಉಳಿಸುವ ಹೊಣೆಗಾರಿಕೆ ಸಂಘಟನೆಗಳು, ಸಾಹಿತ್ಯಜ್ಞರು, ಹೋರಾಟಗಾರರು ಮತ್ತು ಪ್ರತಿಯೊಬ್ಬ ಕನ್ನಡಿಗರ ಮೇಲಿದೆ,” ಎಂದು ಹೇಳಿದರು.
“ಕನ್ನಡ ನಶಿಸುವುದಿಲ್ಲ, ನಂಬುವುದಿಲ್ಲ”
ಕನ್ನಡದ ಭವಿಷ್ಯದ ಬಗ್ಗೆ ಆತಂಕ ವ್ಯಕ್ತಪಡಿಸುವವರ ಅಭಿಪ್ರಾಯವನ್ನು ತಿರಸ್ಕರಿಸಿದ ಅವರು —
“ಕನ್ನಡ ಸಾಗರದಾಚೆಗೂ ಹರಡಿದೆ. ಭೈರಪ್ಪ, ಕುವೆಂಪು, ಬೇಂದ್ರೆ — ಇಂತಹ ಮಹಾನುಭಾವರ ಸಾಹಿತ್ಯ ನಮ್ಮ ಶಕ್ತಿಯಾಗಿದೆ. ಕನ್ನಡ ನಾಶವಾಗುವುದಿಲ್ಲ, ನಾಶವಾಗಲಾರದು,” ಎಂದರು.
ಅವರು ಕನ್ನಡಿಗರಿಗೆ ಸಂದೇಶ ನೀಡುತ್ತಾ ಹೇಳಿದರು:
“ವರ್ಷ ಪೂರ್ತಿ ಕನ್ನಡಿಗರಾಗೋಣ. ಹೊರಗಿನವರಿಗೆ ಕನ್ನಡ ಕಲಿಸೋಣ, ಕನ್ನಡ ಮಾತನಾಡೋಣ.”
“ಕನ್ನಡ ಪತ್ರಿಕೆ ಮನಸ್ಸಿಗೆ ನೆಮ್ಮದಿ; ಎಲೆಕ್ಟ್ರಾನಿಕ್ ಮೀಡಿಯಾ ಬಿಪಿ-ಶುಗರ್ ತರಿಸುತ್ತದೆ”
ರಾಜಕೀಯ ಮತ್ತು ಸಂಸ್ಕೃತಿಯ ಮೇಲಿನ ಪ್ರಭಾವದ ಬಗ್ಗೆ ಮಾತನಾಡಿದ ಅವರು,
“ಕನ್ನಡ ಪತ್ರಿಕೆ ಓದಿದರೆ ನೆಮ್ಮದಿ ಸಿಗುತ್ತದೆ; ಇಂದಿನ ಎಲೆಕ್ಟ್ರಾನಿಕ್ ಮಾಧ್ಯಮಗಳು ಬಿಪಿ, ಶುಗರ್ ತರಿಸುತ್ತವೆ,” ಎಂದು ಚುಟುಕಾಗಿ ಹೇಳಿದರು.
“ಕರ್ನಾಟಕ ಮೊದಲು — ನಂತರ ಭಾರತ,” ಎನ್ನುವ ನುಡಿಯಿಂದ ಅವರು ತಮ್ಮ ಭಾಷಣಕ್ಕೆ ತೆರೆ ಎಳೆದರು.
ಸಮ್ಮೇಳನದಲ್ಲಿ ಗಣ್ಯರ ಹಾಜರಿ
ಕಾರ್ಯಕ್ರಮದಲ್ಲಿ ಅಧ್ಯಕ್ಷತೆ ವಹಿಸಿದ ಹಿರಿಯ ಸಾಹಿತಿ ಸುರೇಶ್ ಕೋರಕೊಪ್ಪ ಅವರು ಧಾರವಾಡ ಸಂಘವು ಬೆಂಗಳೂರಿನಲ್ಲಿ ಕಾರ್ಯಕ್ರಮ ನಡೆಸಿದುದಕ್ಕೆ ಪ್ರಶಂಸೆ ಸಲ್ಲಿಸಿದರು.
ಮುಖ್ಯ ಅತಿಥಿಗಳಾಗಿ —
-
ಡಾ. ವಿ. ಮುರುಳಿ ಮೋಹನ್
-
ಪ್ರೊ. ಕೆ.ಸಿ. ಮುನಿಯಪ್ಪ
-
ಕೆ.ಬಿ. ಪರಮೇಶ್ವರಪ್ಪ
-
ರಾಷ್ಟ್ರ ಪ್ರಶಸ್ತಿ ಪುರಸ್ಕೃತ ಶಿಕ್ಷಕಿ ಬಸಮ್ಮ ನರಸಾಪುರ
-
ನಟಿ ಪ್ರಣಾವಿಗೌಡ
-
ದಿವ್ಯಾಂಜಲಿ
-
ಸುರೇಂದ್ರ ಗುಡ್ಡೆಹೋಟೆಲ್
-
ಕೆ.ಎಸ್. ವೀರೇಶ್
-
ಸಂಗಮನಾಥ್ ಸಜ್ಜನ್
ಮುಂತಾದ ಗಣ್ಯರು ಉಪಸ್ಥಿತರಿದ್ದರು.
75 ಮಂದಿಗೆ ರಾಜ್ಯೋತ್ಸವ ಪ್ರಶಸ್ತಿ
ಈ ಸಂದರ್ಭ ಗಂಧದಗುಡಿ ರಾಜರತ್ನ ರಾಜ್ಯೋತ್ಸವ ಪ್ರಶಸ್ತಿಯನ್ನು ಡಾ. ಸಿಸಿರಾ – ಹೇಮಾವತಿ ದಂಪತಿ, ಪ್ರೊ. ವೀಣಾ ಎನ್. ವಿನೋದ್, ಡಾ. ಪ್ರತಿಮಾ ನಾಗರಾಜ್, ರಾಮನಗರದ ಶೈಲಾ ಶ್ರೀನಿವಾಸ್ ಸೇರಿದಂತೆ 75 ಮಂದಿಗೆ ಪ್ರದಾನ ಮಾಡಲಾಯಿತು.
