ನವದೆಹಲಿ/ಬೆಂಗಳೂರು, ಆ.18:ಪ್ರತಿಷ್ಠಿತ ಅಂತಾರಾಷ್ಟ್ರೀಯ ಶಾಲಾ ಮಟ್ಟದ ಫುಟ್ಬಾಲ್ ಟೂರ್ನಮೆಂಟ್ ಸುಬ್ರೋಟೋ ಕಪ್ ತನ್ನ 64ನೇ ಆವೃತ್ತಿಗೆ ಕಾಲಿಟ್ಟಿದೆ. ಈ ಬಾರಿ ಒಟ್ಟು 106 ತಂಡಗಳು — ಜೂನಿಯರ್ ಹುಡುಗರ (U-17), ಜೂನಿಯರ್ ಹುಡುಗಿಯರ (U-17) ಹಾಗೂ ಸಬ್-ಜೂನಿಯರ್ ಹುಡುಗರ (U-15) — ಮೂರು ವಿಭಾಗಗಳಲ್ಲಿ ಪ್ರಶಸ್ತಿಗಾಗಿ ಪೈಪೋಟಿ ನಡೆಸಲಿವೆ. ಜೊತೆಗೆ ನಾಲ್ಕು ವಿದೇಶಿ ತಂಡಗಳು ಸಹ ಸ್ಪರ್ಧೆಗೆ ಕಾಲಿಟ್ಟಿವೆ.
ಆಗಸ್ಟ್ 19ರಿಂದ ಸೆಪ್ಟೆಂಬರ್ 25ರವರೆಗೆ ನಡೆಯಲಿರುವ ಈ ಕಪ್ ದೆಹಲಿ-ಎನ್ಸಿಆರ್ ಮತ್ತು ಬೆಂಗಳೂರಿನ ವಿವಿಧ ಮೈದಾನಗಳಲ್ಲಿ ಜರುಗಲಿದೆ. ವಾಯುಮಾರ್ಷಲ್ ಎಸ್. ಶಿವಕುಮಾರ್ VSM, ಏರ್ ಆಫೀಸರ್-ಇನ್-ಚಾರ್ಜ್ ಆಡಳಿತ ಹಾಗೂ SMSES ಉಪಾಧ್ಯಕ್ಷರು, ಮತ್ತು ಭಾರತೀಯ ಫುಟ್ಬಾಲ್ ಆಟಗಾರ್ತಿ ದಲಿಮಾ ಛಿಬರ್ ಅವರು ಉದ್ಘಾಟನಾ ಸಮಾರಂಭದಲ್ಲಿ ಭಾಗವಹಿಸಿದರು.
“ಯುವ ಕ್ರೀಡಾಪಟುಗಳಿಗೆ ದೊಡ್ಡ ವೇದಿಕೆ”
ಕಾರ್ಯಕ್ರಮದಲ್ಲಿ ಮಾತನಾಡಿದ ವಾಯುಮಾರ್ಷಲ್ ಎಸ್. ಶಿವಕುಮಾರ್ ಅವರು, “ಭಾರತೀಯ ವಾಯುಪಡೆ ಮತ್ತು SMSES ಪ್ರತಿವರ್ಷ ಟೂರ್ನಮೆಂಟ್ ಅನ್ನು ಉತ್ತಮಗೊಳಿಸಲು ಬದ್ಧವಾಗಿದೆ. ಇದು ಯುವ ಕ್ರೀಡಾಪಟುಗಳಿಗೆ ತಮ್ಮ ವೃತ್ತಿಜೀವನದ ಮುಂದಿನ ಹಂತಕ್ಕೆ ಏರಲು ವೇದಿಕೆಯಾಗಿದೆ” ಎಂದು ಹೇಳಿದರು.
“ನನ್ನ ಕನಸು ಇಲ್ಲೇ ಆರಂಭವಾಯಿತು”
ದಲೀಮಾ ಛಿಬರ್ ಅವರು, “2011ರ ಮೊದಲ ಮಹಿಳಾ ಅಂಡರ್-17 ಸುಬ್ರೋಟೋ ಕಪ್ನಿಂದ ನನ್ನ ಪ್ರಯಾಣ ಆರಂಭವಾಯಿತು. ಇಂದಿಗೂ ಈ ಟೂರ್ನಮೆಂಟ್ ಸಾವಿರಾರು ಹುಡುಗರು-ಹುಡುಗಿಯರ ಕನಸುಗಳಿಗೆ ರೆಕ್ಕೆ ನೀಡುತ್ತಿದೆ. ಅನೇಕರು ಇಲ್ಲಿಂದ ರಾಷ್ಟ್ರೀಯ ತಂಡಗಳಿಗೆ ಸೇರಿದ್ದಾರೆ” ಎಂದು ಅಭಿಪ್ರಾಯಪಟ್ಟರು.
ಪಂದ್ಯ ಸ್ಥಳಗಳು:
- ದೆಹಲಿ/ಎನ್ಸಿಆರ್: ಅಂಬೇಡ್ಕರ್ ಕ್ರೀಡಾಂಗಣ, ತೇಜಸ್ ಮೈದಾನ, ಸುಬ್ರೋಟೋ ಪಾರ್ಕ್ ಮೈದಾನ, ಪಿಂಟೋ ಪಾರ್ಕ್ ಮೈದಾನ
- ಬೆಂಗಳೂರು: ಏರ್ ಫೋರ್ಸ್ ಶಾಲೆ (ಜಲಹಳ್ಳಿ), ಏರ್ ಫೋರ್ಸ್ ಶಾಲೆ (ಯೆಲಹಂಕ), HQ ಟ್ರೈನಿಂಗ್ ಕಮಾಂಡ್ ಮೈದಾನ
ಕಾರ್ಯಕ್ರಮ ವೇಳಾಪಟ್ಟಿ:
- ಜೂನಿಯರ್ ಹುಡುಗಿಯರು (U-17): ಆಗಸ್ಟ್ 19 – ಆಗಸ್ಟ್ 28
- ಸಬ್-ಜೂನಿಯರ್ ಹುಡುಗರು (U-15): ಸೆಪ್ಟೆಂಬರ್ 2 – ಸೆಪ್ಟೆಂಬರ್ 11
- ಜೂನಿಯರ್ ಹುಡುಗರು (U-17): ಸೆಪ್ಟೆಂಬರ್ 16 – ಸೆಪ್ಟೆಂಬರ್ 25
ಮುಖ್ಯ ದಿನಾಂಕಗಳು:
- ಉದ್ಘಾಟನಾ ಸಮಾರಂಭ: ಆಗಸ್ಟ್ 19
- ಫೈನಲ್ (ಜೂನಿಯರ್ ಹುಡುಗಿಯರು): ಆಗಸ್ಟ್ 28
- ಫೈನಲ್ (ಸಬ್-ಜೂನಿಯರ್ ಹುಡುಗರು): ಸೆಪ್ಟೆಂಬರ್ 11
- ಸಮಾಪನ ಸಮಾರಂಭ ಹಾಗೂ ಫೈನಲ್ (ಜೂನಿಯರ್ ಹುಡುಗರು): ಸೆಪ್ಟೆಂಬರ್ 25
ಹಿಂದಿನ (63ನೇ) ಆವೃತ್ತಿಯಲ್ಲಿ ಮಣಿಪುರದ ಟಿಜಿ ಇಂಗ್ಲಿಷ್ ಶಾಲೆ (ಜೂನಿಯರ್ ಹುಡುಗರು), ಜಾರ್ಖಂಡ್ನ ಮಾದರ್ ಇಂಟರ್ನ್ಯಾಶನಲ್ ಶಾಲೆ (ಜೂನಿಯರ್ ಹುಡುಗಿಯರು), ಮೇಘಾಲಯದ ನೊಂಗಿರಿ ಪ್ರೆಸ್ಬಿಟೇರಿಯನ್ ಶಾಲೆ (ಸಬ್-ಜೂನಿಯರ್ ಹುಡುಗರು) ಪ್ರಶಸ್ತಿಗಳನ್ನು ಗೆದ್ದಿದ್ದವು.
ಈ ಬಾರಿ 200ಕ್ಕೂ ಹೆಚ್ಚು ಪಂದ್ಯಗಳು ನಡೆಯಲಿದ್ದು, ಇಂಡಿಯನ್ ಟೈಗರ್ ಮತ್ತು ಟೈಗ್ರೆಸ್ ಕ್ಯಾಂಪೇನ್ ಭಾಗವಾಗಿ ಏಳು ಪ್ರತಿಭಾನ್ವಿತ ಆಟಗಾರರನ್ನು ಆಯ್ಕೆ ಮಾಡಿ ಜರ್ಮನಿಯಲ್ಲಿ ಉನ್ನತ ಮಟ್ಟದ ತರಬೇತಿ ನೀಡಲಾಗುತ್ತದೆ.
