ದೇವನಹಳ್ಳಿ, ಜೂನ್ 25: “ನಮ್ಮ ಪ್ರಾಣ ಬೇಕಾದರೂ ಬಿಡುತ್ತೇವೆ, ಆದರೆ ನಮ್ಮ ಮಣ್ಣನ್ನು ಮಾತ್ರ ಮಾರಿಕೊಳ್ಳುವುದಿಲ್ಲ” ಎಂಬ ಘೋಷಣೆಯೊಂದಿಗೆ ದೇವನಹಳ್ಳಿ ತಾಲೂಕಿನ ಚನ್ನರಾಯಪಟ್ಟಣ ಹೋಬಳಿಯ 13 ಗ್ರಾಮಗಳ ಸಾವಿರಾರು ರೈತರು, ಮಹಿಳೆಯರು ಹಾಗೂ ಸಾರ್ವಜನಿಕರು ಭೂಸ್ವಾಧೀನದ ವಿರುದ್ಧ ‘ದೇವನಹಳ್ಳಿ ಚಲೋ’ ಚಳವಳಿಗೆ ಒಗ್ಗೂಡಿದ್ದಾರೆ.
ರಾಜ್ಯ ಸರ್ಕಾರ ಕೈಗಾರಿಕಾ ಉದ್ದೇಶಕ್ಕಾಗಿ 1777 ಎಕರೆ ಕೃಷಿಭೂಮಿಯನ್ನು ಸ್ವಾಧೀನಪಡಿಸಿಕೊಳ್ಳಲು ಮುಂದಾಗಿರುವ ಕ್ರಮದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸುತ್ತಾ, ಪಾಳ್ಯ, ಹರಳೂರು, ಮಲ್ಲೇಪುರ, ನಲ್ಲೂರು, ಚನ್ನರಾಯಪಟ್ಟಣ ಸೇರಿದಂತೆ 13 ಗ್ರಾಮಗಳವರು ಒಂದು ಮನಸ್ಸಿನಿಂದ ಹೋರಾಟಕ್ಕೆ ಕಾಲಿಟ್ಟಿದ್ದಾರೆ. ತಮ್ಮ ಊರಿನ ಮಣ್ಣನ್ನು ತಂದ ಮಹಿಳೆಯರು ಗಿಡಕ್ಕೆ ಮಣ್ಣು ಸುರಿದು ಹೋರಾಟಕ್ಕೆ ಸಂಕೇತಾತ್ಮಕ ಚಾಲನೆ ನೀಡಿದರು.
ದಿಟ್ಟ ಪ್ರತಿಜ್ಞೆಯ ಘೋಷಣೆ:
ಚೀಮಾಚನಹಳ್ಳಿಯ ರೈತ ಮುಖಂಡ ರಮೇಶ್ ನೇತೃತ್ವದಲ್ಲಿ ನಡೆದ ಪ್ರತಿಜ್ಞಾ ವಿಧಿಯಲ್ಲಿ ಸಾವಿರಾರು ಜನರು ಭಾಗವಹಿಸಿ, ತಮ್ಮ ಭೂಮಿಯನ್ನು ಯಾವುದೇ ಬೆಲೆಗೆ ಮಾರುವುದಿಲ್ಲ ಎಂಬ ಸಾಂಸ್ಕೃತಿಕ ಮತ್ತು ಭಾವನಾತ್ಮಕ ಪ್ರತಿಜ್ಞೆ ಕೈಗೊಂಡರು. ಪ್ರತಿಜ್ಞೆಯಲ್ಲಿ ಅವರು ಹೇಳಿದರು:
“1188 ದಿನಗಳಿಂದ ಹೋರಾಡುತ್ತಿದ್ದೇವೆ. ನಮ್ಮ ಪೋಷಕರ ಬೇರೂರಿದ ಈ ಮಣ್ಣನ್ನು ಕಳೆದುಕೊಳ್ಳಲು ನಾವು ಸಿದ್ಧರಿಲ್ಲ. ದುರಾಸೆಗಳನ್ನೋ, ಬೆದರಿಕೆಗಳನ್ನೋ ನಾವು ಅಂಗೀಕರಿಸುವುದಿಲ್ಲ. ಭೂಮಿ ನಮ್ಮ ಜೀವ, ಅದನ್ನು ನಾವು ಬಿಟ್ಟುಕೊಡುವುದಿಲ್ಲ.”ಎಂದರು.
ಸಂಘಟನೆಗಳ ಒಗ್ಗಟ್ಟಿಗೆ ಸಾಕ್ಷಿ:
‘ಸಂಯುಕ್ತ ಹೋರಾಟ ಕರ್ನಾಟಕ’ ನೇತೃತ್ವದಲ್ಲಿ ನಡೆದ ಈ ಹೋರಾಟಕ್ಕೆ ರಾಜ್ಯದ ಹಲವು ಸಂಘಟನೆಗಳು ಬೆಂಬಲ ವ್ಯಕ್ತಪಡಿಸಿವೆ. ಹೋರಾಟದಲ್ಲಿ ಭಾಗವಹಿಸಿದ್ದ ಪ್ರಮುಖ ಮುಖಂಡರಲ್ಲಿ ಎಚ್.ಎಸ್. ಬಸವರಾಜಪ್ಪ, ಪ್ರಕಾಶ್ ಕಮ್ಮರಡಿ, ಚುಕ್ಕಿ ನಂಜುಂಡಸ್ವಾಮಿ, ಮಾವಳ್ಳಿ ಶಂಕರ್, ವರಲಕ್ಷ್ಮಿ, ನೂರ್ ಶ್ರೀಧರ್, ಮುಖ್ಯಮಂತ್ರಿಚಂದ್ರು, ಎಸ್.ಜಿ. ಸಿದ್ದರಾಮಯ್ಯ ಸೇರಿದಂತೆ ಹಲವಾರು ಮುಖಂಡರು ವೇದಿಕೆಯಲ್ಲಿ ಉಪಸ್ಥಿತರಿದ್ದರು.
ಹೋರಾಟದ ಕೇಂದ್ರಭಾವ:
-
1777 ಎಕರೆ ಕೃಷಿ ಭೂಮಿಗೆ ಜೀವದಂತೆ ಬೆಸೆದುಕೊಂಡಿರುವ ಗ್ರಾಮಸ್ಥರು.
-
1188 ದಿನಗಳಿಂದ ನಿರಂತರ ಶಾಂತಮಯ ಹೋರಾಟ.
-
ಮಣ್ಣಿಗೆ ಜೀವದ ಮಟ್ಟದ ನಂಟು ಹೊಂದಿರುವ ಜನರು – ವ್ಯಾಪಾರದ ಸಾಮಗ್ರಿಯಾಗಿ ನೋಡಲು ಸಾಧ್ಯವಿಲ್ಲ ಎನ್ನುವ ಸ್ಪಷ್ಟ ಧೋರಣೆ.
ವಕೀಲರಿಂದ ಬೆಂಬಲ:
ದೇವನಳ್ಳಿಯ ವಕೀಲ ಸಂಘದಿಂದ ಜಾಥವನ್ನು ಕೈಗೊಂಡು “ದೇವನಹಳ್ಳಿ ಚಲೋ” ಹೋರಾಟಕ್ಕೆ ಬೆಂಬಲ ವ್ಯಕ್ತ ಪಡಿಸಿದರು.
ಸರ್ಕಾರಕ್ಕಿರುವ ಸವಾಲು:
ಸರ್ಕಾರದ ಭೂಸ್ವಾಧೀನ ನಿರ್ಧಾರಕ್ಕೆ ಪ್ರತಿಭಟನೆಗಳು ತೀವ್ರ ರೂಪ ಪಡೆದುಕೊಳ್ಳುತ್ತಿರುವ ಈ ಹಿನ್ನಲೆಯಲ್ಲಿ, ಮುಂದಿನ ಹಂತದಲ್ಲಿ ಸರ್ಕಾರದ ಪ್ರತಿಕ್ರಿಯೆ ಮಹತ್ವಪೂರ್ಣವಾಗಲಿದೆ. ರೈತರ ಹೋರಾಟದಲ್ಲಿ ಭಾವನೆ, ಹಕ್ಕು, ಸಂಸ್ಕೃತಿಯ ಮೌಲ್ಯಗಳ ಮಿಶ್ರಣ ಸ್ಪಷ್ಟವಾಗಿದ್ದು, ಇದು ಕೇವಲ ಭೂಮಿಯ ಬಗ್ಗೆ ಅಲ್ಲ – ಅದು ಜೀವಭೂತವಾದ ಅಸ್ತಿತ್ವದ ಬಗ್ಗೆ ಹೋರಾಟವಾಗಿದೆ.
ಪ್ರತಿಭಟನಕಾರರ ಬಂಧನ:
ಸಂಜೆಯಾಗುತ್ತಿದ್ದಂತೆ ಹೋರಾಟ ತೀವ್ರ ಸ್ವರೂಪ ಪಡೆದು, ಅಹೋರಾತ್ರಿ ಧರಣಿಗೆ ಮುಂದಾದ ರೈತರನ್ನು ಪೋಲಿಸ್ರು ಬಂಧಿಸಿ, ಹೋರಾಟದ ತೀವ್ರತೆಯನ್ನು ಹತ್ತಿಕ್ಕೂವ ಪ್ರಯತ್ನಕ್ಕೆ ಮುಂದಾದರು.
ಒಟ್ಟಿನಲ್ಲಿ “ದೇವನಹಳ್ಳಿ ಚಲೋ” ಎಚ್ಚರಿಕೆಯ ಗಂಟೆಯಾಗಲಿದೆ. ಸರ್ಕಾರದ ನಡೆ ಹಾಗೂ ಜನರ ಒತ್ತಾಯ ನಡುವೆ ಎಂಥ ನಿರ್ಧಾರ ಬರುತ್ತದೆ ಎಂಬುದನ್ನು ಕಾದು ನೋಡಬೇಕಾಗಿದೆ.
