ಕೋಲ್ಕತ್ತಾ : ಕಳೆದ ನವೆಂಬರ್ ನಾಲ್ಕರಿಂದ ಪಶ್ಚಿಮ ಬಂಗಾಳದಲ್ಲಿ ವಿಶೇಷ ತೀವ್ರ ಪರಿಷ್ಕರಣೆ ( SIR ) ಪ್ರಕ್ರಿಯೆ ಚಾಲ್ತಿಯಲ್ಲಿದೆ. ಡಿಸೆಂಬರ್ ನಾಲ್ಕರಂದು ಈ ಪ್ರಕ್ರಿಯೆ ಮುಗಿಯಬೇಕು ಎನ್ನುವ ಟಾರ್ಗೆಟ್ ಅನ್ನು ಕೇಂದ್ರ ಚುನಾವಣಾ ಆಯೋಗ ಹಾಕಿಕೊಂಡಿದೆ. ಈ ಡೆಡ್ಲೈನ್ ಇಂದಾಗಿ, ಅನಾವಶ್ಯಕವಾಗಿ ಬಿಎಲ್ಒಗಳ ಮೇಲೆ ಒತ್ತಡ ಬೀಳುತ್ತಿದೆ ಎನ್ನುವುದು ವಿಪಕ್ಷಗಳ ಅದರಲ್ಲೂ ಪ್ರಮುಖವಾಗಿ, ಅಲ್ಲಿನ ಸಿಎಂ ಮಮತಾ ಬ್ಯಾನರ್ಜಿಯವರ ಆಕ್ರೋಶಕ್ಕೆ ಕಾರಣವಾಗಿದೆ.
ಕಳೆದ ಮೂರು ವಾರಗಳಿಂದ, ಅವ್ಯಾಹತವಾಗಿ ರಾಜ್ಯದಲ್ಲಿ ನೆಲೆಸಿರುವ ಅಕ್ರಮ ಬಾಂಗ್ಲಾದೇಶಿಗಳು ದೇಶವನ್ನು ತೊರೆಯುತ್ತಿರುವ ಸುದ್ದಿ ದೊಡ್ಡ ಚರ್ಚೆಯಲ್ಲಿದೆ. ತಮ್ಮ ದೇಶಕ್ಕೆ ವಾಪಸ್ ಆಗುತ್ತಿರುವವರ ಹೇಳಿಕೆಯ ಪ್ರಕಾರ, ಹಲವು ದಶಕಗಳಿಂದ, ನಕಲಿ ಕಾರ್ಡ್ ಅನ್ನು ಬಳಸಿಕೊಂಡು, ಇಲ್ಲಿನ ಸೌಲಭ್ಯವನ್ನು ಪಡೆದುಕೊಳ್ಳುತ್ತಿದ್ದಾರೆ. ಒಂದು ರೀತಿಯಲ್ಲಿ, ಭಾರತೀಯರ ತೆರಿಗೆ ಹಣ, ಯಾರೋ ಅಕ್ರಮಿಗಳ ಪಾಲಾಗುತ್ತಿದೆ.
ಕೈಯಲ್ಲಿ ಸಣ್ಣ ಚೀಲ, ಪ್ಲಾಸ್ಟಿಕ್ ಬಾಟಲಿಗಳನ್ನು ಕೈಯಲ್ಲಿ ಹಿಡಿದುಕೊಂಡು, ಮಕ್ಕಳು, ಮಹಿಳೆಯರು ಸೇರಿದಂತೆ, ಮೌನವಾಗಿ ಅಕ್ರಮ ಬಾಂಗ್ಲಾದೇಶಿಗಳು ಮೌನವಾಗಿ ನಿಂತಿದ್ದರು. ಬಿಎಸ್ಎಫ್ ಸಿಬ್ಬಂದಿಗಳ ಪ್ರಶ್ನೆಗೆ ಅವರುಗಳು ಕೊಟ್ಟ ಉತ್ತರ ನಿಜಕ್ಕೂ ಶಾಕ್ ಆಗುವಂತೆ ಇತ್ತು. ಯಾಕೆಂದರೆ, ಪಶ್ಚಿಮ ಬಂಗಾಳದ ದಳ್ಳಾಳಿಗಳು, ಅವರಿಗೆಲ್ಲಾ, ನಕಲಿ ಆಧಾರ್ ಕಾರ್ಡ್ ಮತ್ತು ವೋಟರ್ ಐಡಿಯನ್ನು ಮಾಡಿಸಿಕೊಟ್ಟಿದ್ದರು.
ಬಿಎಸ್ಎಫ್ ಸಿಬ್ಬಂದಿಗಳಲ್ಲಿ ಅವರುಗಳು ಮಾಡುತ್ತಿರುವ ಏಕೈಕ ಮನವಿ ಏನಂದರೆ, ನಮಗೇನು ತೊಂದರೆ ಕೊಡಬೇಡಿ, ನಮ್ಮನ್ನು ನಮ್ಮ ದೇಶದ ಮನೆಗೆ ಹೋಗಲು ಬಿಡಿ ಎನ್ನುವುದು. ಪಶ್ಚಿಮ ಬಂಗಾಳದ ಗಡಿಯಲ್ಲಿರುವ ಭದ್ರತಾ ಸಿಬ್ಬಂದಿಗಳು ಮತ್ತು ಸ್ಥಳೀಯರ ಪ್ರಕಾರ, ನವೆಂಬರ್ ನಲ್ಲಿ ಏನು ಎಸ್ಐಆರ್ ಪ್ರಕ್ರಿಯೆ ಆರಂಭವಾಯಿತೋ ಅಲ್ಲಿಂದ, ಅಕ್ರಮ ವಲಸೆಗಿರು ಸಾವಿರಾರು ಸಂಖ್ಯೆಯಲ್ಲಿ ದೇಶವನ್ನು ಖಾಲಿ ಮಾಡುತ್ತಿದ್ದಾರೆ.
ಭಾರತೀಯ ಪೌರತ್ವದ ಸೂಕ್ತ ದಾಖಲೆಯಿಲ್ಲದೇ ಇರುವುದರಿಂದ, ದೇಶ ಖಾಲಿ ಮಾಡುತ್ತಿರುವವರ ಸಂಖ್ಯೆ ತೀವ್ರ ಪ್ರಮಾಣದಲ್ಲಿ ಹೆಚ್ಚಾಗುತ್ತಿದೆ. SIR ಪ್ರಕ್ರಿಯೆ, ಡಿಸೆಂಬರ್ ನಲ್ಲಿ ಮುಗಿಯುತ್ತಿರುವ ಹಿನ್ನಲೆಯಲ್ಲಿ, ಆ ದಿನಾಂಕದೊಳಗೆ ಭಾರತವನ್ನು ಖಾಲಿ ಮಾಡಲು, ಅಕ್ರಮ ಬಾಂಗ್ಲಾದೇಶಿಗಳು ಮುಂದಾಗಿದ್ದಾರೆಂದು, ಪಶ್ಚಿಮ ಬಂಗಾಳದ ಸ್ಥಳೀಯ ಮಾಧ್ಯಮಗಳು ವರದಿ ಮಾಡುತ್ತಿವೆ.
ಯಾಕಾಗಿ, ಒಂದೇ ಸಮನೆ, ಅಕ್ರಮ ಬಾಂಗ್ಲಾದೇಶಿಗಳು ದೇಶ ತೊರೆಯುತ್ತಿದ್ದಾರೆ ಎನ್ನುವುದಕ್ಕೆ ಇದನ್ನು ನೇರವಾಗಿ SIR ಪ್ರಕ್ರಿಯೆಗೆ ಜೋಡಿಸಲಾಗುತ್ತಿದೆ. ಇದೊಂದು, ಮುಂದೊಂದು ದಿನ ಬಂಧನಕ್ಕೆ ಕಾರಣವಾಗಬಹುದು ಎನ್ನುವುದು ಇವರ ಭೀತಿಗೆ ಕಾರಣವಾಗಿದೆ. ಇವರೆಲ್ಲರೂ, ಮಧ್ಯವರ್ತಿಗಳ ಮೂಲಕ ನಕಲಿ ಆಧಾರ್ ಕಾರ್ಡ್, ರೇಷನ್ ಕಾರ್ಡ್ ಮತ್ತು ಮತದಾರರ ಗುರುತಿನ ಚೀಟಿಯನ್ನು ಪಡೆದುಕೊಂಡಿದ್ದರು. ಈಗ, ಇವರಿಗೆ ನಕಲಿ ಕಾರ್ಡ್ ಮಾಡಿಸಿಕೊಟ್ಟವರೂ ಭಯಭೀತರಾಗಿದ್ದಾರೆ.
ಬಡತನದಿಂದಾಗಿ ಭಾರತಕ್ಕೆ ಬಂದೆ, ಇಲ್ಲಿ ನೆಲೆಸಲು ನಮಗೆ ಸರಿಯಾದ ದಾಖಲೆಗಳಿಲ್ಲ. ಈಗ, ನಾನು ವಾಪಸ್ ಹೋಗಲು ಹೊರಟಿದ್ದೇನೆ. ನಮಗೆ, ಮಧ್ಯವರ್ತಿಗಳು ಗುರುತಿನ ಚೀಟಿಯನ್ನು ಮಾಡಿಸಿಕೊಟ್ಟಿದ್ದರು. ಅದೆಲ್ಲಾ, ನಕಲಿ ಎನ್ನುವುದು ನಮಗೆ ಗೊತ್ತಾಗುತ್ತಿದೆ. ಹಾಗಾಗಿ, ಬಾಂಗ್ಲಾದೇಶಕ್ಕೆ ನಾವು ವಾಪಸ್ ಹೋಗುತ್ತಿದ್ದೇವೆ ಎನ್ನುವುದು ತುಂಬಾ ಜನರ ಅಭಿಪ್ರಾಯವಾಗಿದೆ.
ಎಂಟು ವರ್ಷಗಳಿಂದ ಹೋಟೆಲ್ ನಲ್ಲಿ ವೇಟರ್ ಆಗಿ ಕೆಲಸ ಮಾಡಿ, ಜೀವನ ನಿರ್ವಹಿಸುತ್ತಿದ್ದೇನೆ. ನನ್ನ ಗುರುತಿನ ದಾಖಲೆಯನ್ನು ಪರಿಶೀಲಿಸಿದರೆ, ನಾನು ಅರೆಸ್ಟ್ ಆಗುವುದು ಗ್ಯಾರಂಟಿ. ಅದಕ್ಕಿಂತ, ನಮ್ಮ ದೇಶಕ್ಕೆ ವಾಪಸ್ ಹೋಗುವುದು ಬೆಟರ್ ಎಂದು ವಾಪಸ್ ಹೊರಟಿದ್ದೇನೆ. ನ್ಯೂಟೌನ್, ಹೌರಾ, ಬಿರಾಟಿ ಮುಂತಾದ ಕೈಗಾರಿಕಾ ಪ್ರದೇಶಗಳಲ್ಲಿ ಅಕ್ರಮವಾಗಿ ನೆಲೆಸಿರುವ ನೂರಾರು ಕಾರ್ಮಿಕರು, ಕೆಲಸ ತೊರೆದು ವಾಪಸ್ ಹೋಗುತ್ತಿದ್ದಾರೆ.
ಭಾರತೀಯರ ತೆರಿಗೆ ದುಡ್ಡಿನ ಲಾಭವನ್ನು ಅಕ್ರಮವಾಗಿ ಬಂದಿರುವ ವಲಸೆಗಾರರು, ನಕಲಿ ರೇಷನ್ ಕಾರ್ಡ್ ಮುಂತಾದವುದರಿಂದ ಬಳಸಿಕೊಳ್ಳುತ್ತಿದ್ದಾರೆ. ಭಾರೀ ವಿವಾದದ ನಡುವೆಯೂ, ಈ ವಿಶೇಷ ತೀವ್ರ ಪರಿಷ್ಕರಣೆ, ಅಕ್ರಮ ಬಾಂಗ್ಲಾದೇಶಿಗಳನ್ನು ಹೊರದಬ್ಬಲು ಒಂದು ಹಂತಕ್ಕೆ ಯಶಸ್ವಿಯಾಗಿದೆ ಎನ್ನುವುದು ರಾಜಕೀಯ ವಿಶ್ಲೇಷಕರ ಅಭಿಪ್ರಾಯವಾಗಿದೆ.
