ಸೋವಿಮಾ: ರಣಜಿ ಟ್ರೋಫಿ 2026–27ರ ಪ್ಲೇಟ್ ವಿಭಾಗದ ಪಂದ್ಯದಲ್ಲಿ ಮಿಜೋರಾಂ ತಂಡದ ಬ್ಯಾಟರ್ ಚಿನ್ಮಯ್ ಸುತಾರ್ ಅಜೇಯ 400 ರನ್ ಗಳಿಸಿ ಐತಿಹಾಸಿಕ ಸಾಧನೆ ಮಾಡಿದ್ದಾರೆ. ಅಕ್ಟೋಬರ್ 19ರಂದು ನಾಗಾಲ್ಯಾಂಡ್ ವಿರುದ್ಧ ನಾಗಾಲ್ಯಾಂಡ್ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಅವರು ಈ ಮೈಲುಗಲ್ಲು ತಲುಪಿದರು.
ಚಿನ್ಮಯ್ ಸುತಾರ್ 517 ಎಸೆತಗಳನ್ನು ಎದುರಿಸಿ 46 ಬೌಂಡರಿ ಹಾಗೂ ಏಳು ಸಿಕ್ಸರ್‌ಗಳ ನೆರವಿನಿಂದ 400 ರನ್ ಗಳಿಸಿದರು. ಅವರ ಅಮೋಘ ಬ್ಯಾಟಿಂಗ್‌ನಿಂದ ಮಿಜೋರಾಂ ತಂಡ 9 ವಿಕೆಟ್‌ಗಳಿಗೆ 581 ರನ್ ಗಳಿಸಿ ಮೊದಲ ಇನಿಂಗ್ಸ್‌ ಘೋಷಿಸಿತು.
ಈ ಸಾಧನೆಯೊಂದಿಗೆ ರಣಜಿ ಟ್ರೋಫಿ ಇತಿಹಾಸದಲ್ಲಿ 400 ರನ್ ಗಳಿಸಿದ ಎರಡನೇ ಬ್ಯಾಟರ್ ಎಂಬ ಹೆಗ್ಗಳಿಕೆಗೆ ಸುತಾರ್ ಪಾತ್ರರಾಗಿದ್ದಾರೆ. 1948–49ರ ಋತುವಿನಲ್ಲಿ ಮಹಾರಾಷ್ಟ್ರ ಪರ ಕಾಥಿಯಾವಾರ್ ವಿರುದ್ಧ ಬಿ.ಬಿ. ನಿಂಬಾಳ್ಕರ್ ಗಳಿಸಿದ್ದ ಅಜೇಯ 443 ರನ್‌ಗಳು ಇಂದಿಗೂ ರಣಜಿ ಟ್ರೋಫಿಯ ಗರಿಷ್ಠ ವೈಯಕ್ತಿಕ ಸ್ಕೋರ್ ಆಗಿದೆ. ಸುತಾರ್ ಅವರ 400 ರನ್‌ಗಳ ಸಾಧನೆಯು ಪೃಥ್ವಿ ಶಾ ಅವರ 379 ರನ್‌ಗಳ ದಾಖಲೆಯನ್ನೂ ಮೀರಿಸಿದೆ.
29 ವರ್ಷದ ಚಿನ್ಮಯ್ ಸುತಾರ್ ಈ ಹಿಂದೆ ಮುಂಬೈ ತಂಡವನ್ನು ಪ್ರತಿನಿಧಿಸಿದ್ದರು. ಅತಿಥಿ ಆಟಗಾರನಾಗಿ ಮಿಜೋರಾಂ ಪರ ಆಡುತ್ತಿರುವ ಅವರು ತಮ್ಮ ಎರಡನೇ ಪ್ರಥಮ ದರ್ಜೆ ಪಂದ್ಯದಲ್ಲೇ ಈ ಅಪರೂಪದ ಸಾಧನೆ ಮಾಡಿದ್ದಾರೆ.
ಭಾರತದ ಪ್ರಮುಖ ದೇಶೀಯ ಪ್ರಥಮ ದರ್ಜೆ ಕ್ರಿಕೆಟ್ ಟೂರ್ನಿಯಾದ ರಣಜಿ ಟ್ರೋಫಿ 1934–35ರ ಋತುವಿನಲ್ಲಿ ಆರಂಭವಾಯಿತು. ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಈ ಟೂರ್ನಿಯನ್ನು ಆಯೋಜಿಸುತ್ತದೆ.
