ಬೀಜಿಂಗ್: ಚೀನಾದ ರಾಜಧಾನಿ ಬೀಜಿಂಗ್ 2035ರ ವೇಳೆಗೆ ‘ಸೂಪರ್‌ ಏಜ್ಡ್‌’ ಸಮಾಜವಾಗಿ ರೂಪುಗೊಳ್ಳುವ ಸಾಧ್ಯತೆಯಿದೆ. ಆಗ ನಗರದ ಜನಸಂಖ್ಯೆಯ ಸುಮಾರು ಮೂರನೇ ಒಂದು ಭಾಗದಷ್ಟು ಜನರು 60 ವರ್ಷ ಅಥವಾ ಅದಕ್ಕಿಂತ ಹೆಚ್ಚಿನ ವಯಸ್ಸಿನವರಾಗಿರಲಿದ್ದಾರೆ ಎಂದು ಅಂದಾಜಿಸಲಾಗಿದೆ.
2025ರ ಅಂತ್ಯದ ವೇಳೆಗೆ ಬೀಜಿಂಗ್‌ನಲ್ಲಿ 60 ವರ್ಷ ಮೇಲ್ಪಟ್ಟ 52.9 ಲಕ್ಷ ಶಾಶ್ವತ ನಿವಾಸಿಗಳಿದ್ದು, ಇದು ನಗರದ ಒಟ್ಟು ಜನಸಂಖ್ಯೆಯ ಶೇ.24.3ರಷ್ಟಾಗಿದೆ. ವೃದ್ಧರ ಜನಸಂಖ್ಯೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಪಿಂಚಣಿ, ಆರೋಗ್ಯ ಸೇವೆ ಮತ್ತು ಹಿರಿಯರ ಆರೈಕೆಯ ಮೇಲಿನ ಬೇಡಿಕೆ ಹೆಚ್ಚುವ ನಿರೀಕ್ಷೆಯಿದೆ.
ಹಿರಿಯರ ಆರೈಕೆಯನ್ನು ಸುಧಾರಿಸಲು ಬೀಜಿಂಗ್ ಮುಂದಿನ ಮೂರು ವರ್ಷಗಳಲ್ಲಿ ಮನೆ ಆಧಾರಿತ ಆರೈಕೆಗಾಗಿ 30,000 ಹಾಸಿಗೆಗಳ ವ್ಯವಸ್ಥೆ ಕಲ್ಪಿಸಲು ಯೋಜಿಸಿದೆ. ಅಲ್ಲದೆ, ನಿವಾಸಿಗಳು ತಮ್ಮ ಮನೆಯಿಂದ 15 ನಿಮಿಷಗಳ ಅಂತರದಲ್ಲಿ ಹಿರಿಯರ ಆರೈಕೆ ಸೇವೆಗಳನ್ನು ಪಡೆಯುವ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸುತ್ತಿದೆ.
ಹಿರಿಯರ ಸಾಮಾಜಿಕ ಭದ್ರತೆಯನ್ನು ಬಲಪಡಿಸುವುದು, ಮೂಲ ಪಿಂಚಣಿ ಮೊತ್ತ ಹೆಚ್ಚಿಸುವುದು, ವೈದ್ಯಕೀಯ ಸಂಸ್ಥೆಗಳು ಮತ್ತು ಆರೈಕೆ ಕೇಂದ್ರಗಳ ನಡುವೆ ಸಮನ್ವಯ ಸಾಧಿಸುವುದು ಸೇರಿದಂತೆ ಹಲವು ಕ್ರಮಗಳನ್ನು ನಗರ ಕೈಗೊಂಡಿದೆ.
ಚೀನಾದ ಜನಸಂಖ್ಯೆ 2022ರಿಂದ ಸತತವಾಗಿ ಕುಸಿಯುತ್ತಿದ್ದು, ವೃದ್ಧರ ಪ್ರಮಾಣ ಹೆಚ್ಚುತ್ತಿದೆ. ಇದರಿಂದ ದುಡಿಯುವ ವಯೋಮಾನದ ಜನರ ಲಭ್ಯತೆ, ಪಿಂಚಣಿ ವೆಚ್ಚ ಮತ್ತು ಆರೋಗ್ಯ ಸೇವೆಗಳ ಮೇಲಿನ ಒತ್ತಡದ ಕುರಿತು ಸರ್ಕಾರ ಗಮನ ಹರಿಸುತ್ತಿದೆ. ಜನನ ಪ್ರಮಾಣ ಹೆಚ್ಚಿಸುವ ಕ್ರಮಗಳಿಗಾಗಿ 2026ರಲ್ಲಿ ಸುಮಾರು 180 ಶತಕೋಟಿ ಯುವಾನ್ ವೆಚ್ಚವಾಗಬಹುದೆಂದು ಅಂದಾಜಿಸಲಾಗಿದೆ.
ಪರೀಕ್ಷಾ ದೃಷ್ಟಿಯಿಂದ ಪ್ರಮುಖ ಅಂಶಗಳು
-
ನಗರ: ಬೀಜಿಂಗ್, ಚೀನಾ
-
‘ಸೂಪರ್‌ ಏಜ್ಡ್‌’ ಸಮಾಜದ ಅಂದಾಜು: 2035
-
2025ರ ಅಂತ್ಯದಲ್ಲಿ 60 ವರ್ಷ ಮೇಲ್ಪಟ್ಟವರು: 52.9 ಲಕ್ಷ
-
ಒಟ್ಟು ಜನಸಂಖ್ಯೆಯಲ್ಲಿ ಅವರ ಪ್ರಮಾಣ: ಶೇ.24.3
-
ಮನೆ ಆಧಾರಿತ ಆರೈಕೆಗೆ ಯೋಜಿತ ಹಾಸಿಗೆಗಳು: 30,000
-
ಹಿರಿಯರ ಆರೈಕೆ ಸೇವೆಯ ಗುರಿ: 15 ನಿಮಿಷಗಳ ಸೇವಾ ಜಾಲ
-
ಚೀನಾದ ಜನಸಂಖ್ಯೆ ಕುಸಿತ ಆರಂಭ: 2022ರಿಂದ
