ನವದೆಹಲಿ: ಪತ್ನಿಯ ಖರ್ಚಿನ ಲೆಕ್ಕ ಕೇಳುವುದು ಅಥವಾ ಕುಟುಂಬದ ಹಣಕಾಸಿನ ಮೇಲೆ ಪತಿ ನಿಯಂತ್ರಣ ವಹಿಸುವುದೇ Section 498A IPC ಅಡಿಯಲ್ಲಿ ಕ್ರೌರ್ಯವಾಗುವುದಿಲ್ಲ ಎಂದು ಸುಪ್ರೀಂ ಕೋರ್ಟ್ ಮಹತ್ವದ ತೀರ್ಪು ನೀಡಿದೆ. ಇದು ಭಾರತೀಯ ಸಮಾಜದ ಸಾಮಾನ್ಯ ಪ್ರತಿಬಿಂಬವಾಗಿದ್ದು, ಇದನ್ನೇ ಅಪರಾಧೀಕರಿಸಲಾಗುವುದಿಲ್ಲ ಎಂದು ನ್ಯಾಯಾಲಯ ಹೇಳಿದೆ.
ಈ ಪ್ರಕರಣದಲ್ಲಿ, ಪತಿ ಮನೆಯ ಖರ್ಚುಗಳನ್ನು ಎಕ್ಸೆಲ್ ಶೀಟ್ನಲ್ಲಿ ದಾಖಲಿಸುವಂತೆ ಪತ್ನಿಗೆ ಸೂಚಿಸಿದ್ದಾನೆ ಮತ್ತು ಪೋಷಕರಿಗೆ ಹಣ ಕಳುಹಿಸಿದ್ದಾನೆ ಎಂಬ ಕಾರಣಕ್ಕೆ ಪತ್ನಿ ಕ್ರೌರ್ಯ ಆರೋಪ ಮಾಡಿದ್ದಳು. ಆದರೆ ಮಾನಸಿಕ ಅಥವಾ ದೈಹಿಕ ಹಾನಿಯ ಸ್ಪಷ್ಟ ಸಾಕ್ಷ್ಯವಿಲ್ಲದೆ ಕೇವಲ ಸಾಮಾನ್ಯ ಆರೋಪಗಳ ಆಧಾರದಲ್ಲಿ ಕ್ರಿಮಿನಲ್ ಪ್ರಕರಣ ದಾಖಲಿಸಲು ಸಾಧ್ಯವಿಲ್ಲ ಎಂದು ಕೋರ್ಟ್ ಸ್ಪಷ್ಟಪಡಿಸಿದೆ.
ನ್ಯಾಯಾಲಯವು ವೈವಾಹಿಕ ವಿವಾದಗಳಲ್ಲಿ ವ್ಯವಹಾರಿಕ ಮತ್ತು ಸಮತೋಲನದ ದೃಷ್ಟಿಕೋನ ಅಗತ್ಯವಿದೆ ಎಂದು ಹೇಳಿದ್ದು, ಪ್ರತಿಯೊಂದು ಗೃಹ ಕಲಹವನ್ನೂ ಅಪರಾಧದ ರೂಪದಲ್ಲಿ ನೋಡಬಾರದು ಎಂದು ಎಚ್ಚರಿಸಿದೆ. 498ಎ ಕಾನೂನು ಗಂಭೀರ ಕ್ರೌರ್ಯಕ್ಕೆ ಮಾತ್ರ ಅನ್ವಯಿಸಬೇಕು, ಸಾಮಾನ್ಯ ದಾಂಪತ್ಯ ಅಸಮಾಧಾನಗಳಿಗೆ ಅಲ್ಲ ಎಂದು ಅಭಿಪ್ರಾಯಪಟ್ಟಿದೆ.
ಈ ತೀರ್ಪು 498ಎ ಕಾನೂನಿನ ವ್ಯಾಪ್ತಿಯನ್ನು ಸ್ಪಷ್ಟಪಡಿಸುವ ಜೊತೆಗೆ, ಕಾನೂನು ದುರುಪಯೋಗವನ್ನು ತಡೆಯುವ ದಿಕ್ಕಿನಲ್ಲಿ ಮಹತ್ವದ ಹೆಜ್ಜೆಯಾಗಿದೆ. ಸಾಕ್ಷ್ಯಾಧಾರಿತ ಪ್ರಕರಣಗಳಿಗಷ್ಟೇ ಕ್ರಿಮಿನಲ್ ಕ್ರಮ ಜರುಗಬೇಕು ಎಂಬ ಸಂದೇಶವನ್ನು ಈ ತೀರ್ಪು ನೀಡುತ್ತದೆ.
[…] […]