ನವದೆಹಲಿ: ಭಾರತದ ಎಲೆಕ್ಟ್ರಾನಿಕ್ಸ್ ಮತ್ತು ಸೆಮಿಕಂಡಕ್ಟರ್ ವಲಯವು 2025ರ ನಂಬಿಕೆಯಿಂದ 2026-27ರ ಅನುಷ್ಠಾನ ಹಾಗೂ ವಿಸ್ತರಣೆಯ ಹಂತಕ್ಕೆ ಪ್ರವೇಶಿಸುತ್ತಿರುವ ಮಹತ್ವದ ಸಮಯದಲ್ಲಿ, ಕೇಂದ್ರ ಸರ್ಕಾರ ಘೋಷಿಸಿರುವ ಬಜೆಟ್ ನೀತಿ ವೇಗವನ್ನು ಪರಿಣಾಮಕಾರಿಯಾಗಿ ಮುಂದುವರಿಸಿದೆ ಎಂದು ಇಂಡಿಯಾ ಎಲೆಕ್ಟ್ರಾನಿಕ್ಸ್ ಅಂಡ್ ಸೆಮಿಕಂಡಕ್ಟರ್ ಅಸೋಸಿಯೇಷನ್ (IESA) ಅಧ್ಯಕ್ಷ ಅಶೋಕ್ ಚಂದಕ್ ಹೇಳಿದ್ದಾರೆ.
ಕಳೆದ ವರ್ಷಗಳಲ್ಲಿ ಭಾರತೀಯ ಸೆಮಿಕಂಡಕ್ಟರ್ ಮಿಷನ್ (ISM), ಎಲೆಕ್ಟ್ರಾನಿಕ್ ಕಾಂಪೊನೆಂಟ್ಸ್ ಮ್ಯಾನುಫ್ಯಾಕ್ಚರಿಂಗ್ ಸ್ಕೀಮ್ (ECMS), PLI, DLI, C2S ಸೇರಿದಂತೆ ವಿವಿಧ ESDM ಉಪಕ್ರಮಗಳ ಮೂಲಕ ಸಾಧಿಸಿದ ಪ್ರಗತಿಯನ್ನು ಈ ಬಜೆಟ್ ಇನ್ನಷ್ಟು ಬಲಪಡಿಸಿದೆ. ಭಾರತವು ಈಗ ಆಕಾಂಕ್ಷೆಯಿಂದ ವಿಶ್ವಾಸಾರ್ಹತೆಯತ್ತ ಸಾಗಿದ್ದು, ಜಾಗತಿಕ ಹೂಡಿಕೆಗಳಿಗೆ ಯೋಗ್ಯವಾದ ತಾಣವಾಗಿ ಗುರುತಿಸಲ್ಪಟ್ಟಿದೆ ಎಂದು ಅವರು ಅಭಿಪ್ರಾಯಪಟ್ಟರು.
ISM 2.0 ಘೋಷಣೆ ಮಹತ್ವದ ಹೆಜ್ಜೆ
ಹಣಕಾಸು ಸಚಿವರು ಘೋಷಿಸಿರುವ ISM 2.0 ಭಾರತದ ಸೆಮಿಕಂಡಕ್ಟರ್ ಮಹತ್ವಾಕಾಂಕ್ಷೆಗೆ ಅತ್ಯಂತ ನಿರ್ಣಾಯಕವಾಗಿದೆ. ಇದು ಕೇವಲ ಫ್ಯಾಬ್ಗಳ ಸ್ಥಾಪನೆಗೆ ಸೀಮಿತವಾಗದೆ, ವಿನ್ಯಾಸ, ಉಪಕರಣಗಳು, ವಸ್ತುಗಳು, ಭಾರತೀಯ ಐಪಿ (IP) ಹಾಗೂ ಪೂರೈಕೆ ಸರಣಿಯ ಸ್ಥಿತಿಸ್ಥಾಪಕತೆಯನ್ನು ಒಳಗೊಂಡ ಪೂರ್ಣ ಮೌಲ್ಯವರ್ಧಿತ ಕಾರ್ಯತಂತ್ರದತ್ತ ಸಾಗುತ್ತಿರುವುದನ್ನು ಸೂಚಿಸುತ್ತದೆ. ಇದರಿಂದ ಭಾರತ ಜಾಗತಿಕ ಸೆಮಿಕಂಡಕ್ಟರ್ ಪರಿಸರ ವ್ಯವಸ್ಥೆಯಲ್ಲಿ ಪ್ರಬಲ ಆಟಗಾರನಾಗಿ ಹೊರಹೊಮ್ಮಲಿದೆ ಎಂದು ಚಂದಕ್ ಹೇಳಿದರು. ಆದರೆ ISM 2.0ಗೆ ಮೀಸಲಾದ ನಿಧಿಯ ಪ್ರಮಾಣವನ್ನು ಇನ್ನೂ ಸ್ಪಷ್ಟಪಡಿಸಬೇಕಿದೆ ಎಂದು ಅವರು ಗಮನಸೆಳೆದರು.
ಎಲೆಕ್ಟ್ರಾನಿಕ್ಸ್ ವಲಯಕ್ಕೆ ₹40,000 ಕೋಟಿ ಬಲ
ಎಲೆಕ್ಟ್ರಾನಿಕ್ ಘಟಕಗಳ ತಯಾರಿಕಾ ಯೋಜನೆ (ECMS)ಗೆ ಉತ್ತಮ ಸ್ಪಂದನೆ ದೊರೆತಿರುವ ಹಿನ್ನೆಲೆಯಲ್ಲಿ, ಅದರ ಅನುದಾನವನ್ನು ₹40,000 ಕೋಟಿಗೆ ಹೆಚ್ಚಿಸಿರುವುದು ಸ್ವಾಗತಾರ್ಹವಾಗಿದೆ. ಜಾಗತಿಕ ಸ್ಪರ್ಧಾತ್ಮಕತೆಗೆ ಸಹಕಾರಿಯಾಗುವಂತೆ ಶೇ. 2ರಷ್ಟು ಲಾಭದ ಮಾರ್ಜಿನ್ ಬೆಂಬಲ, ಘಟಕಗಳ ದಾಸ್ತಾನು ಮಳಿಗೆಗಳು ಮತ್ತು ಲಾಜಿಸ್ಟಿಕ್ಸ್ ಹಬ್ಗಳ ವ್ಯವಸ್ಥೆ ಉದ್ಯಮಕ್ಕೆ ಹೊಸ ಉತ್ಸಾಹ ನೀಡಲಿದೆ ಎಂದು ಅವರು ಹೇಳಿದರು.
ಉದ್ಯಮ ಚಾಲಿತ ಸಂಶೋಧನೆ, ತರಬೇತಿ, ಉದ್ಯೋಗ ಸೃಷ್ಟಿ, ಎಐ ಮಿಷನ್, ಕ್ವಾಂಟಮ್ ಮಿಷನ್ ಹಾಗೂ RDI ನಿಧಿಗಳ ಮೂಲಕ ತಂತ್ರಜ್ಞಾನ ಅಳವಡಿಕೆಗೆ ಹೆಚ್ಚಿನ ಒತ್ತು ನೀಡಲಾಗಿದೆ. ಜೊತೆಗೆ ಬ್ಯಾಟರಿ, ಇಂಧನ ಸಂಗ್ರಹಣೆ, ಸೌರ ವಲಯ, ಅಪರೂಪದ ಭೂಮೂಲ ಧಾತುಗಳು, ಮೂಲಸೌಕರ್ಯ ಮತ್ತು ಕಸ್ಟಮ್ಸ್ ಪ್ರಕ್ರಿಯೆಗಳ ಸುಧಾರಣೆಗಳು ESDM ವಲಯಕ್ಕೆ ಪೂರಕವಾಗಿವೆ.
₹8,000 ಕೋಟಿ ಹೆಚ್ಚುವರಿ ವೆಚ್ಚ ಹಂಚಿಕೆ
2026-27ನೇ ಸಾಲಿಗೆ ಸುಮಾರು ₹8,000 ಕೋಟಿ ಹೆಚ್ಚುವರಿ ವೆಚ್ಚ ಹಂಚಿಕೆ ಮಾಡಲಾಗಿದ್ದು, ಫ್ಯಾಬ್ಗಳಿಗೆ ₹2,000 ಕೋಟಿ, OSATಗಳಿಗೆ ₹5,000 ಕೋಟಿ, SCL ಆಧುನೀಕರಣಕ್ಕೆ ₹900 ಕೋಟಿ ಹಾಗೂ ECMS ವಲಯಕ್ಕೆ ₹1,500 ಕೋಟಿ ಅನುದಾನ ನೀಡಲಾಗಿದೆ.
ಭವಿಷ್ಯದ ಸವಾಲುಗಳು
ಮುಂದಿನ ದಿನಗಳಲ್ಲಿ ಮಹತ್ವಾಕಾಂಕ್ಷೆ ಮತ್ತು ಅನುಷ್ಠಾನದ ನಡುವಿನ ಸಮತೋಲನ, ಖಾಸಗಿ ವಲಯದ ಸಿದ್ಧತೆ, ಪ್ರತಿಭೆಗಳ ಕೊರತೆ ನಿವಾರಣೆ ಹಾಗೂ ಅಂತರರಾಷ್ಟ್ರೀಯ ಸಹಭಾಗಿತ್ವದ ಮೇಲೆ ಗಮನ ಹರಿಸುವುದು ಅಗತ್ಯವೆಂದು ಚಂದಕ್ ಹೇಳಿದರು.
ಒಟ್ಟಾರೆಯಾಗಿ, ಕೇಂದ್ರ ಬಜೆಟ್ನ ಈ ಕ್ರಮಗಳು ಎಲೆಕ್ಟ್ರಾನಿಕ್ಸ್ ಮತ್ತು ಸೆಮಿಕಂಡಕ್ಟರ್ ತಯಾರಿಕೆಯಲ್ಲಿ ಭಾರತವನ್ನು ಜಾಗತಿಕವಾಗಿ ಸ್ಪರ್ಧಾತ್ಮಕ ಹಾಗೂ ವಿಶ್ವಾಸಾರ್ಹ ಕೇಂದ್ರವಾಗಿ ರೂಪಿಸುವ ಬಲವಾದ ಅಡಿಪಾಯವನ್ನು ಹಾಕಿವೆ. ಈ ದೃಷ್ಟಿಕೋನವನ್ನು ಕಾರ್ಯರೂಪಕ್ಕೆ ತರಲು ಉದ್ಯಮದೊಂದಿಗೆ ನಿಕಟವಾಗಿ ಕೆಲಸ ಮಾಡಿದ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯದ (MeitY) ಅಧಿಕಾರಿಗಳನ್ನು ಐಇಎಸ್ಎ ಅಭಿನಂದಿಸಿದೆ.
