ಶೂನ್ಯ ತ್ಯಾಜ್ಯ ಉಪಕ್ರಮವನ್ನು ಕರಾವಳಿಗೆ ಕೊಂಡೊಯ್ದಿವೆ!

ಬೆಂಗಳೂರು: ರಿಯಲ್ ಎಸ್ಟೇಟ್ ಉದ್ಯಮವು ಕೇವಲ ನಗರಗಳನ್ನು ನಿರ್ಮಿಸುವುದಷ್ಟೇ ಅಲ್ಲದೆ, ಪ್ರಕೃತಿಯ ಇಕೋಸಿಸ್ಟಂಗಳನ್ನು ರಕ್ಷಿಸುವ ಜವಾಬ್ದಾರಿಯನ್ನೂ ಹೊರಬೇಕಿದೆ. ಈ ನಿಟ್ಟಿನಲ್ಲಿ ಮಹತ್ತರ ಹೆಜ್ಜೆ ಇಟ್ಟಿರುವ ಪ್ರಮುಖ ರಿಯಲ್ ಎಸ್ಟೇಟ್ ಸಂಸ್ಥೆ ‘ಸತ್ವ ಗ್ರೂಪ್’ (Sattva Group), ಪರಿಸರ ಸಂರಕ್ಷಣೆಗಾಗಿ ‘ಕರ್ನಾಟಕ ಶೂನ್ಯ ತ್ಯಾಜ್ಯ ಉಪಕ್ರಮ’ವನ್ನು ಕರಾವಳಿ ತೀರಕ್ಕೆ ವಿಸ್ತರಿಸಿದೆ.

ಮೇ 23ರಂದು ಸತ್ವ ಗ್ರೂಪ್ ಸ್ಟ್ರಾಟಜಿ ಉಪಾಧ್ಯಕ್ಷ ಶಿವಂ ಅಗರ್ವಾಲ್ ಮತ್ತು ರಿಪರ್ಪಸ್ ಗ್ಲೋಬಲ್ ಸಹ-ಸಂಸ್ಥಾಪಕ ಆದಿತ್ಯ ಸಿರೋಯಾ ಅವರು ಮಂಗಳೂರಿನ ಸೋಮೇಶ್ವರ ಕಡಲತೀರ, ಪಚನಾಡಿ, ಕಾಡೇಶ್ವಲ್ಯ ಮತ್ತು ಬಂಟ್ವಾಳ ಮೆಟೀರಿಯಲ್ ರಿಕವರಿ ಫೆಸಿಲಿಟಿ (MRF) ಪ್ರದೇಶಗಳಿಗೆ ಖುದ್ದಾಗಿ ಭೇಟಿ ನೀಡಿ, ಕರಾವಳಿ ಸ್ವಚ್ಛತಾ ಕಾರ್ಯಕ್ರಮದಲ್ಲಿ ಭಾಗವಹಿಸಿದರು.

ತ್ರಿವಳಿ ಮುಖ್ಯಾಂಶಗಳು

• ಮೂರು ವರ್ಷಗಳ ಮಹತ್ವಾಕಾಂಕ್ಷಿ ಗುರಿ: ಭೂಮಿ ದಿನ 2026ರಂದು ನಾಲೆಡ್ಜ್ ರಿಯಾಲ್ಟಿ ಟ್ರಸ್ಟ್ ಸಹಯೋಗದಲ್ಲಿ ಪ್ರಾರಂಭವಾದ ಈ ಯೋಜನೆಯಡಿ 3.5 ರಿಂದ 4.5 ಮಿಲಿಯನ್ ಕೆಜಿ (35-45 ಲಕ್ಷ ಕೆಜಿ) ತ್ಯಾಜ್ಯ ಸಂಗ್ರಹಿಸುವ ಗುರಿ ಹೊಂದಲಾಗಿದೆ.

• ಸಾಮಾಜಿಕ ಕಳಕಳಿ: ಈ ಯೋಜನೆಯು ಸುಮಾರು 80,000 ಕುಟುಂಬಗಳನ್ನು ಔಪಚಾರಿಕ ತ್ಯಾಜ್ಯ ನಿರ್ವಹಣೆ ವ್ಯಾಪ್ತಿಗೆ ತರಲಿದ್ದು, ಮುಖ್ಯವಾಗಿ 200 ಮಹಿಳಾ ತ್ಯಾಜ್ಯ ಕಾರ್ಮಿಕರಿಗೆ ಘನತೆಯ ಜೀವನೋಪಾಯ ಒದಗಿಸಲಿದೆ.

• ಮೊದಲ ತಿಂಗಳ ಮೈಲಿಗಲ್ಲು: ಕೇವಲ ಒಂದೇ ತಿಂಗಳಲ್ಲಿ 1.5 ಲಕ್ಷ ಕೆಜಿ ಒಣ ತ್ಯಾಜ್ಯ ಸಂಗ್ರಹಿಸಲಾಗಿದ್ದು, 50,000 ಕೆಜಿಗೂ ಅಧಿಕ ಕಡಿಮೆ ಮೌಲ್ಯದ ಪ್ಲಾಸ್ಟಿಕ್ ಅನ್ನು ನೈತಿಕವಾಗಿ ಸಂಸ್ಕರಿಸಲಾಗಿದೆ.

ಬೋರ್ಡ್ ರೂಂನಿಂದ ಕಡಲತೀರದವರೆಗೆ: ನೈಜ ಕೆಲಸಕ್ಕೆ ಮುನ್ನುಡಿ

ಸೋಮೇಶ್ವರ ಕಡಲತೀರದಲ್ಲಿ ಆರಂಭವಾದ ಈ ಸ್ವಚ್ಛತಾ ಆಂದೋಲನದಲ್ಲಿ ಅಧಿಕಾರಿಗಳು 40ಕ್ಕೂ ಹೆಚ್ಚು ಸ್ಥಳೀಯ ಸ್ವಯಂಸೇವಕರೊಂದಿಗೆ ಕೈಜೋಡಿಸಿ ಒಂದೇ ಬಾರಿಗೆ 250 ಕಿಲೋಗ್ರಾಂ ತ್ಯಾಜ್ಯವನ್ನು ಸಂಗ್ರಹಿಸಿದರು.

ಈ ಬಗ್ಗೆ ಮಾತನಾಡಿದ ಸತ್ವ ಗ್ರೂಪ್ ಸ್ಟ್ರಾಟಜಿ ಉಪಾಧ್ಯಕ್ಷ ಶಿವಂ ಅಗರ್ವಾಲ್, “ನಾವು ಬೋರ್ಡ್ ರೂಂಗಳಲ್ಲಿ ಮತ್ತು ಗಳಿಕೆಯ ಕರೆಗಳಲ್ಲಿ ಸುಸ್ಥಿರತೆ (Sustainability) ಕುರಿತು ಮಾತನಾಡಬಹುದು. ಆದರೆ ಕಡಲತೀರದಲ್ಲಿ ನಿಂತು, ಇಲ್ಲಿನ ಸ್ಥಳೀಯರೊಂದಿಗೆ ಪ್ಲಾಸ್ಟಿಕ್ ಸಂಗ್ರಹಿಸುವುದು ನೈಜ ಅನುಭವ ನೀಡುತ್ತದೆ. ಇಲ್ಲಿ ನಿಜವಾದ ಕೆಲಸವಾಗುತ್ತಿದೆ ಮತ್ತು ನಮ್ಮ ಪ್ರಯತ್ನ ಹೀಗೇ ಮುಂದುವರಿಯಲಿದೆ” ಎಂದರು.

ಪ್ಲಾಸ್ಟಿಕ್ ಸಮುದ್ರ ಸೇರುವ ಮುನ್ನವೇ ತಡೆ: ತಂಡವು ಕಾಡೇಶ್ವಲ್ಯ ಗ್ರಾಮಕ್ಕೆ ಭೇಟಿ ನೀಡಿ ಮನೆ ಮನೆ ತ್ಯಾಜ್ಯ ಸಂಗ್ರಹ ವ್ಯವಸ್ಥೆಯನ್ನು ವೀಕ್ಷಿಸಿತು. ನೇತ್ರಾವತಿ ನದಿಯ ಉದ್ದಕ್ಕೂ ಪ್ಲಾಸ್ಟಿಕ್ ತ್ಯಾಜ್ಯಗಳು ಹರಿದು ಸಮುದ್ರ ಸೇರುವ ಮುನ್ನವೇ ಅವುಗಳನ್ನು ಸೂಕ್ಷ್ಮವಾಗಿ ತಡೆದು, ವಿಂಗಡಿಸುವ ಮೂಲಸೌಕರ್ಯಗಳ ಅಗತ್ಯತೆಯನ್ನು ತಂಡವು ಅಂದಾಜಿಸಿದೆ.

ಭವಿಷ್ಯದ ಸುಸ್ಥಿರ ಪರಿಸರಕ್ಕೆ ಬದ್ಧತೆ

ದಕ್ಷಿಣ ಕನ್ನಡ ಜಿಲ್ಲಾ ಪಂಚಾಯಿತಿ ಮತ್ತು ಮಂಗಳ ರಿಸೋರ್ಸ್ ಮ್ಯಾನೇಜ್ಮೆಂಟ್ ಮೂಲಕ ಈಗಾಗಲೇ 30ಕ್ಕೂ ಹೆಚ್ಚು ಗ್ರಾಮ ಪಂಚಾಯಿತಿಗಳಿಗೆ ಈ ಯೋಜನೆಯಡಿ ಬೆಂಬಲ ನೀಡಲಾಗುತ್ತಿದೆ.

ನಾಲೆಡ್ಜ್ ರಿಯಾಲಿಟಿ ಟ್ರಸ್ಟ್ ಇ.ಎಸ್.ಜಿ. (ESG) ಮುಖ್ಯಸ್ಥ ಜಿಜಿ ಥಾಮಸ್ ಮಾತನಾಡಿ, “ನಮ್ಮ ಕಟ್ಟಡಗಳ ಆಚೆಗೂ ಸಮಾಜಕ್ಕೆ ಮೌಲ್ಯ ಸೃಷ್ಟಿಸಲು ನಾವು ಬದ್ಧರಾಗಿದ್ದೇವೆ. ರಿಪರ್ಪಸ್ ಉಪಕ್ರಮದ ಮೊದಲ ಹಂತದ ಫಲಿತಾಂಶಗಳು ಭರವಸೆ ಮೂಡಿಸಿದ್ದು, ಭವಿಷ್ಯದಲ್ಲಿ ಸ್ವಚ್ಛ ಸಮುದಾಯಗಳನ್ನು ಸೃಷ್ಟಿಸಲಿದ್ದೇವೆ” ಎಂದರು.

ಅದೇ ರೀತಿ, ರಿಪರ್ಪಸ್ ಗ್ಲೋಬಲ್ ಸಹ-ಸಂಸ್ಥಾಪಕ ಆದಿತ್ಯ ಸಿರೋಯಾ ಅವರು, “ಸತ್ವದಂತಹ ಸಂಸ್ಥೆಗಳು ಕೇವಲ ಕಾಗದದ ಬದ್ಧತೆಗೆ ಸೀಮಿತವಾಗದೆ ವಿಸ್ತರಿಸಬಹುದಾದ ವ್ಯವಸ್ಥೆಗಳ ಮೇಲೆ ಹೂಡಿಕೆ ಮಾಡುತ್ತಿರುವುದು ಉತ್ತೇಜನಕಾರಿಯಾಗಿದೆ. ಇದು ಕರ್ನಾಟಕದ ಆಚೆಗೂ ಮಾದರಿಯಾಗಬಲ್ಲ ಪರಿಸರ ವ್ಯವಸ್ಥೆಯಾಗಿದೆ” ಎಂದು ಶ್ಲಾಘಿಸಿದರು.

2026ರ ಅಂತ್ಯದ ವೇಳೆಗೆ ಗುರಿ: ಕರ್ನಾಟಕವು 320 ಕಿಲೋಮೀಟರ್ ಉದ್ದದ ಕಡಲತೀರವನ್ನು ಹೊಂದಿದೆ. 2026ರ ವರ್ಷದ ಅಂತ್ಯದ ವೇಳೆಗೆ ಈ ಉಪಕ್ರಮವು ದಕ್ಷಿಣ ಕನ್ನಡದ 15 ಗ್ರಾಮಗಳಲ್ಲಿ ಸಾಮರ್ಥ್ಯವೃದ್ಧಿ ಕಾರ್ಯಕ್ರಮ ನಡೆಸಿ, 10 ಲಕ್ಷ ಕಿಲೋಗ್ರಾಂಗಳಷ್ಟು ಒಣ ತ್ಯಾಜ್ಯವನ್ನು (ಇದರಲ್ಲಿ 4 ಲಕ್ಷ ಕೆಜಿ ಪ್ಲಾಸ್ಟಿಕ್ ಒಳಗೊಂಡಿದೆ) ಸಂಗ್ರಹಿಸುವ ಮತ್ತು 60 ತ್ಯಾಜ್ಯ ಕೆಲಸಗಾರರ ಜೀವನೋಪಾಯವನ್ನು ಸುಧಾರಿಸುವ ಮಹತ್ತರ ಗುರಿ ಹೊಂದಿದೆ.