ತುಮಕೂರಿನಲ್ಲಿ ನಡೆದ ಎರಡು ದಿವಸಗಳ ನಾಟಕೋತ್ಸವಕ್ಕೆ ಶಾಸಕ ಜಿ.ಬಿ.ಜ್ಯೋತಿಗಣೇಶ್ ಚಾಲನೆ ನೀಡಿ ಮಾತನಾಡುತ್ತಾ ನೀಲಕಂಠೇಶ್ವರ ನಾಟ್ಯ ಸಂಘವು ಪ್ರತಿ ವರ್ಷ ರಾಜ್ಯಾದ್ಯಂತ ಸದಭಿರುಚಿ ನಾಟಕಗಳನ್ನು ಪ್ರದರ್ಶನ ಮಾಡುತ್ತಾ ಬಂದಿದೆ ಎಂದು ತುಮಕೂರು ನಗರ ವಿಧಾನಸಭಾ ಕ್ಷೇತ್ರದ ಶಾಸಕ ಜ್ಯೋತಿ ಗಣೇಶ್ ವ್ಯಾಖ್ಯಾನಿಸಿದರು.
ಅವರು ತುಮಕೂರಿನ ಗುಬ್ಬಿ ವೀರಣ್ಣ ಕಲಾಕ್ಷೇತ್ರದಲ್ಲಿ ಝೆನ್ ಟೀಮ್, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ಕರ್ನಾಟಕ ನಾಟಕ ಅಕಾಡೆಮಿ ಸಹಯೋಗದಲ್ಲಿ ದಿವಂಗತ ಚಿದಂಬರರಾವ್ ಜಂಬೆ ನೆನಪಿನಲ್ಲಿ ಆಯೋಜಿಸಲಾಗಿದ್ದ ಎರಡು ದಿವಸಗಳ ನೀನಾಸಂ ನಾಟಕೋತ್ಸವಕ್ಕೆ ನಗಾರಿ ಬಾರಿಸುವುದರ ಮೂಲಕ ಮೂಲಕ ಚಾಲನೆ ನೀಡಿ ಮಾತನಾಡಿದರು.
ಮೊದಲೆಲ್ಲಾ ನೀನಾಸಂ ಪ್ರತಿ ವರ್ಷ ಒಂದು ಕನ್ನಡ ನಾಟಕ, ಒಂದು ಭಾರತೀಯ ನಾಟಕ ಹಾಗೂ ಮತ್ತೊಂದು ಪಾಶ್ಚಿಮಾತ್ಯ ನಾಟಕಗಳನ್ನು ತಿರುಗಾಟಕ್ಕೆ ಆಯ್ಕೆ ಮಾಡಿಕೊಂಡು ಪ್ರದರ್ಶನ ಮಾಡುತ್ತಾ ಇತ್ತು. ಈಗ ಪ್ರತಿ ವರ್ಷ ಎರಡು ನಾಟಕಗಳು ಆಯ್ಕೆ ಮಾಡಿಕೊಂಡು ರಾಜ್ಯಾದ್ಯಂತ ಪ್ರದರ್ಶನ ನೀಡುತ್ತಿದೆ. ರಾಮಾಯಾಣ, ಮಹಾಭಾರತದಂತಹ ಕಥೆಗಳನ್ನು ಆಯ್ಕೆ ಮಾಡಿಕೊಂಡು ಅದರಲ್ಲಿನ ಆದರ್ಶಗಳನ್ನು ಜನರಿಗೆ ದಾಟಿಸುವ ಕೆಲಸವನ್ನು ನೀನಾಸಂ ಮಾಡುತ್ತಿದೆ ಎಂದರು.
ಕಲೆ ಸಂಸ್ಕೃತಿಗೆ ಕರ್ನಾಟಕದಲ್ಲೇ ತುಮಕೂರಿಗೆ ವಿಶಿಷ್ಟ ಸ್ಥಾನವಿದೆ. ಇದನ್ನು ಇದನ್ನು ಉಳಿಸಿ ಬೆಳೆಸುವಂತಹ ಕೆಲಸವನ್ನು ಮಾಡಬೇಕಾಗಿದೆ ಎಂದ ಅವರು ಮುಂದಿನ ತಲೆಮಾರುಗಳನ್ನು ನಾಟಕಕ್ಕೆ ಕರೆ ತರುವ ಕೆಲಸವನ್ನು ತುಮಕೂರಿನ ಝೆನ್ ಟೀಮ್ ಮಾಡುವಂತಾಗಲಿ ಎಂದು ಆಶಿಸಿದರು.
ಸಿನಿಮಾ ಹಾಗೂ ರಂಗಭೂಮಿ ಕಲಾವಿದ ಗೋಮಾರದಹಳ್ಳಿ ಮಂಜುನಾಥ್ ಮಾತನಾಡಿ ಹೊಸ ಅಲೆಯ ನಾಟಕಗಳು ತುಮಕೂರಿನಲ್ಲಿ ಪ್ರದರ್ಶನವಾಗುತ್ತಿರುವುದು ಶ್ಲಾಘನೀಯ ಎಂದರು. ತುಮಕೂರಿನಲ್ಲಿ ಝೆನ್ ಟೀಮ್ ಕಳೆದ 2 ದಶಕಗಳಿಂದ ನಿರಂತರವಾಗಿ ಆಧುನಿಕ ರಂಗಭೂಮಿಯನ್ನು ಜೀವಂತವಾಗಿ ಇಟ್ಟಿದ್ದಾರೆ ಎಂದರು.ನೀನಾಸಂ ಸಂಸ್ಥೆಯನ್ನು ಅತ್ಯಂತ ಶಿಸ್ತು ಬದ್ಧವಾಗಿ ಕಟ್ಟಿದ ಹೆಗ್ಗಳಿಕೆ ಚಿದಂಬರರಾವ್ ಜಂಬೆ ಅವರದ್ದು. ಅವರ ನೆನಪಿನಲ್ಲಿ ನಾಟಕೋತ್ಸನ ನಡೆಯುತ್ತಿರುವುದು ಖುಷಿಯ ವಿಷಯ ಎಂದರು.
ಕೈಗಾರಿಕೋದ್ಯಮಿ ಅಧ್ಯಕ್ಷ ಹೆಚ್.ಜಿ. ಚಂದ್ರಶೇಖರ್, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಾಯಕ ನಿರ್ದೇಶಕ ಈಶ್ವರ್ ಕು ಮಿರ್ಜಿ, ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ ನ ಅಧ್ಯಕ್ಷ ಕೆ.ಎಸ್. ಸಿದ್ಧಲಿಂಗಪ್ಪ ಮಾತನಾಡಿದರು, ಕಾರ್ಯಕ್ರಮದಲ್ಲಿ ಪ್ರಾಸ್ತಾವಿಕವಾಗಿ ಮಾತನಾಡಿದ ಝೆನ್ ಟೀಮ್ ನ ಮುಖ್ಯಸ್ಥ ಹಾಗೂ ಕರ್ನಾಟಕ ನಾಟಕ ಅಕಾಡೆಮಿ ಸದಸ್ಯ ಉಗಮ ಶ್ರೀನಿವಾಸ್ ಅವರು ತುಮಕೂರಿನಲ್ಲಿ ಝೆನ್ ಟೀಮ್ ಯಶಸ್ವಿಯಾಗಿ 2 ದಶಕಗಳ ಕಾಲ ನಾಟಕಗಳನ್ನು ಆಯೋಜಿಸುತ್ತಾ ಬಂದಿರುವ ಹಿಂದೆ ತುಮಕೂರಿನ ಜನರ ಪ್ರೀತಿ ಪೂರ್ವಕ ಬೆಂಬಲವೇ ಕಾರಣ ಎಂದರು. ವೇದಿಕೆ ಕಾರ್ಯಕ್ರಮದ ಬಳಿಕ ಪಾದುಕ ಕಿರೀಟಿ ನಾಟಕ ಪ್ರದರ್ಶನಕೊಂಡಿತು.
– ಚಂದ್ರಚೂಡ ಕೆ.ಬಿ
