ಭಾರತ-ನ್ಯೂಜಿಲೆಂಡ್ ಮುಕ್ತ ವ್ಯಾಪಾರ ಒಪ್ಪಂದಕ್ಕೆ ಅಂತಿಮ ಮುದ್ರೆ: ಆರ್ಥಿಕ ಸಂಬಂಧದಲ್ಲಿ ಹೊಸ ಯುಗ

ನವದೆಹಲಿ: ಭಾರತ ಮತ್ತು ನ್ಯೂಜಿಲೆಂಡ್ ನಡುವಿನ ಐತಿಹಾಸಿಕ ಮುಕ್ತ ವ್ಯಾಪಾರ ಒಪ್ಪಂದಕ್ಕೆ (FTA) ಏಪ್ರಿಲ್ 27, 2026 ರಂದು ನವದೆಹಲಿಯಲ್ಲಿ ಅಧಿಕೃತವಾಗಿ ಸಹಿ ಹಾಕಲಾಯಿತು. ಈ ಒಪ್ಪಂದವನ್ನು ನ್ಯೂಜಿಲೆಂಡ್ ಪ್ರಧಾನಿ ಕ್ರಿಸ್ಟೋಫರ್ ಲುಕ್ಸನ್ “ಪೀಳಿಗೆಗೊಮ್ಮೆ ಸಂಭವಿಸುವ ಒಪ್ಪಂದ” ಎಂದು ಬಣ್ಣಿಸಿದ್ದರೆ, ಭಾರತವು ಆಯಕಟ್ಟಿನ ವಲಯಗಳನ್ನು ಸಂರಕ್ಷಿಸುವುದರೊಂದಿಗೆ ಮಾರುಕಟ್ಟೆ ವಿಸ್ತರಣೆಗೆ ಒತ್ತು ನೀಡಿದೆ.

ಮಾರುಕಟ್ಟೆ ಪ್ರವೇಶ ಮತ್ತು ಸುಂಕದ ವಿವರಗಳು

ಈ ಒಪ್ಪಂದದ ಅಡಿಯಲ್ಲಿ ದ್ವಿಪಕ್ಷೀಯ ವ್ಯಾಪಾರದ ಗಣನೀಯ ಭಾಗವನ್ನು ಸುಂಕ ಮುಕ್ತಗೊಳಿಸಲಾಗಿದೆ:

• ಭಾರತದ ಕೊಡುಗೆ: ಭಾರತವು ಶೇ. 70.03 ರಷ್ಟು ಸುಂಕದ ಶ್ರೇಣಿಗಳಲ್ಲಿ ರಿಯಾಯಿತಿ ನೀಡಿದ್ದು, ಇದು ಉಭಯ ದೇಶಗಳ ಒಟ್ಟು ವ್ಯಾಪಾರ ಮೌಲ್ಯದ ಶೇ. 95 ರಷ್ಟನ್ನು ಒಳಗೊಳ್ಳುತ್ತದೆ. ಸಂವೇದನಾಶೀಲ ವಲಯಗಳನ್ನು ರಕ್ಷಿಸಲು ಶೇ. 29.97 ರಷ್ಟು ಶ್ರೇಣಿಗಳನ್ನು ಈ ಪಟ್ಟಿಯಿಂದ ಹೊರಗಿಡಲಾಗಿದೆ.

• ಭಾರತಕ್ಕೆ ಲಾಭ: ನ್ಯೂಜಿಲೆಂಡ್ ಮಾರುಕಟ್ಟೆಯಲ್ಲಿ ಭಾರತೀಯ ಉತ್ಪನ್ನಗಳಿಗೆ ಶೇ. 100 ರಷ್ಟು ಸುಂಕ ಮುಕ್ತ ಪ್ರವೇಶ ಸಿಗಲಿದೆ.

ಪ್ರಮುಖ ಲಾಭ ಪಡೆಯುವ ವಲಯಗಳು

ಈ ಒಪ್ಪಂದದಿಂದ ಎರಡು ದೇಶಗಳ ವಿವಿಧ ಕ್ಷೇತ್ರಗಳಿಗೆ ಅನುಕೂಲವಾಗಲಿದೆ:

• ಭಾರತದ ರಫ್ತು: ಜವಳಿ, ಪಾದರಕ್ಷೆಗಳು, ಚರ್ಮದ ಉತ್ಪನ್ನಗಳು, ಆಭರಣಗಳು, ಎಂಜಿನಿಯರಿಂಗ್ ಸರಗುಗಳು ಮತ್ತು ಸಂಸ್ಕರಿಸಿದ ಆಹಾರ ಪದಾರ್ಥಗಳು. ಇದು ಭಾರತದ MSME ವಲಯಕ್ಕೆ ಭಾರಿ ಬಲ ನೀಡಲಿದೆ.

• ನ್ಯೂಜಿಲೆಂಡ್ ರಫ್ತು: ಮರ, ಉಣ್ಣೆ, ಕುರಿ ಮಾಂಸ ಮತ್ತು ಆಯ್ದ ಕೃಷಿ ಉತ್ಪನ್ನಗಳು.

ಹಂತ ಹಂತವಾಗಿ ಸುಂಕ ಇಳಿಕೆ

• ಒಟ್ಟು ಶ್ರೇಣಿಗಳ ಪೈಕಿ ಶೇ. 30 ರಷ್ಟು ಉತ್ಪನ್ನಗಳ ಮೇಲಿನ ಸುಂಕವನ್ನು ತಕ್ಷಣವೇ ರದ್ದುಗೊಳಿಸಲಾಗಿದೆ.

• ಶೇ. 35.60 ರಷ್ಟು ಉತ್ಪನ್ನಗಳ ಮೇಲಿನ ಸುಂಕವನ್ನು 3, 5, 7 ಮತ್ತು 10 ವರ್ಷಗಳ ಅವಧಿಯಲ್ಲಿ ಹಂತ ಹಂತವಾಗಿ ಕಡಿಮೆ ಮಾಡಲಾಗುವುದು.

• ವೈನ್, ಔಷಧಗಳು, ಅಲ್ಯೂಮಿನಿಯಂ ಮತ್ತು ಕಬ್ಬಿಣದ ಉತ್ಪನ್ನಗಳ ಮೇಲೆಯೂ ಸುಂಕ ಕಡಿತ ಮಾಡಲಾಗಿದೆ. ಕಿವಿ ಹಣ್ಣು, ಸೇಬು ಮತ್ತು ಜೇನುತುಪ್ಪದಂತಹ ಉತ್ಪನ್ನಗಳಿಗೆ ‘ಟ್ಯಾರಿಫ್ ರೇಟ್ ಕೋಟಾ’ ಅನ್ವಯಿಸಲಾಗುತ್ತದೆ.

ಸ್ಪರ್ಧಾತ್ಮಕ ಪರೀಕ್ಷೆಗಳಿಗಾಗಿ ಪ್ರಮುಖಾಂಶಗಳು:

• ಮಾತುಕತೆ ಆರಂಭ: ಮಾರ್ಚ್ 2025 ರಲ್ಲಿ ಆರಂಭವಾಗಿ, ಡಿಸೆಂಬರ್ 22, 2025 ರಂದು ಮುಕ್ತಾಯಗೊಂಡಿತು.

• ವ್ಯಾಪಾರ ಗುರಿ: ಮುಂದಿನ ಐದು ವರ್ಷಗಳಲ್ಲಿ ದ್ವಿಪಕ್ಷೀಯ ವ್ಯಾಪಾರವನ್ನು 5 ಬಿಲಿಯನ್ ಡಾಲರ್‌ಗೆ ದ್ವಿಗುಣಗೊಳಿಸುವುದು.

• ಸಹಿ ಹಾಕಿದವರು: ಭಾರತದ ಪರವಾಗಿ ಪಿಯೂಷ್ ಗೋಯಲ್ ಮತ್ತು ನ್ಯೂಜಿಲೆಂಡ್ ಪರವಾಗಿ ಟಾಡ್ ಮೆಕ್ಲೇ.